Svrabín koqkámpè Francis taqkèní 2024 nǿngò "shaqré shaqtvng, vsvk té bǿì we" vsv̀ngrì ò àngní lvmvng tvyø nvng singnø̀ dvrá shvng vrìng bǿà we

Svrabín koqkámpè Francis taqkèní 2024 nǿngò "shaqré shaqtvng, vsvk té bǿì we" vsv̀ngrì ò àngní lvmvng tvyø nvng singnø̀ dvrá shvng vrìng bǿà we

Myanmar móngdàn taqgø nǿng vrv̀m July shvlá (26) ni taq "Àngpè, àngmè àngni" svng wáshì we gø íe. Weni taqnø Yesu Kristu ò àngcì ní àngkàng íwe Àngmè Mari ò àngpè ní àngmè "St. Joachim nvng St. Anne" níò bóy àngni svng Catholic shvngø̀mré kèní màná dø̀mrø ku wáshì wegø íe.

Vle v́:mìwe 2021 nǿng taq Svrabín koqkámpè Francis taqkèní July (25) ni svng "Mònggvn àngcì, àngkàn, shaqré shaqtang" rìò àngni wanø mvsvt pv̀ng bǿà wegø íe. We nǿngni nǿng vrv̀m we bóy àngni svng wáshì we àng mvtú svng gø vtànò we dø tiqdvchá ya 2024 nǿngò  "Mònggvn àngcì, àngkàn, shaqré shaqtang" bóy àngni mvtú svng gø "Shvgùn Zàywà bok 71:9" taqkèní 'Ngà cvrǿng rāng dvgvp ngà svng mèguranøng. Ngà kùngà vnǿn rāng dvgvp ngà svng mèlàngànøng." wawe jømciq kèní dvtú shìwe gø íe.

Yanǿngò July 25 ni taq wáshì vdu longwe we bóy àngni taq mònggv̀n móngdàn vrv̀m kèní Catholic shvngø̀mré vsvngrì nø ""Mònggvn àngcì, àngkàn, shaqré shaqtang" July 28 ni taq vrá língnø̀ wàlv́m gø dvtú bǿà we íe. Weni nø nárni taq vdu longwe íratnø̀ vdèò àngcì àngkàng maq shaqré shaqtang rì kaq svng vriq lv́m rvtø̀ gø lúnshì lv́m ílonge. Àngmaq ò ìshøt jejú rì svng vtoshì lúnlv́m dvpvt ratnø gø íe.

Svrabín koqkám pèò àngké róng kèní "Mònggvn àngcì, àngkàn, shaqré shaqtang" maqò kámnøt rì kadangshì rvnaq we, wedø íwe kámnøt rì taqkèní àngmaqò chø̀m vsv̀ngrì kaq mvkok vcù:ngwe nvng shvngø̀mré kaqsvng kadø wa tubùm dvbangā we dang vrá vtánā nø̀ shvdǿm wegø íe.

Shvngø̀mré taqkèní yadø íwe "Mònggvn àngcì, àngkàn, shaqré shaqtang" rìsvng shvring we nø vsv̀ng tiq mvril nvng tiq mvril shóngnøt kèní vzø̀mwe nvng àngmaqò shømløm we lvpat rì svng vrangā we gø íe. Pàwálv́m wani 'nvmlat nvmpvng 2:18 taq "Wekvt Gvray Yehowaí, vsvng wegǿ angwāwā v́l nø màshvla, ang dvpvt vdū vbóng we dvbvngshú tiq gǿ ngàí mv́nālv́m íe wae."

Yalòng vjúrøt tvyø nø nøngmaq dèni bat vsvng mvngpòng mvdòrì ò àng dvjà svng vtánā wegø íe. Pàwálv́m wani "Mònggvn àngcì, àngkàn, shaqré shaqtang" rì dvshá mvré àngcǿ àngcè màdá tiqgǿ wa vlwe rì gvzà vlwe íe. Tiqkvt kvt wedø íwe vsvngrì nø chø̀m vsvngrì dvpvt shìwvt íe wanø̀ àngmaq svng gurò we vhǿmò vsv̀ngrì gø vle. Vcù:ng lv́m vsvng àngkàng màdá vsvk lvpat tewe vsv̀ngrì gvzà vlwe gø íe.

Yadø íwe lvpat dvjà rì svng vhǿmì we chø̀m dø̀ngku rì nvng shvngø̀mré mè taqkèní "Mònggvn àngcì, àngkàn, shaqré shaqtang" rì svng mvkok vcù:nglv́m vtóng, layà rì svng vrá tiqkvt vrang dvzaqshì lv́m, àngmaq kaq svng rvtø̀ zí lúnlv́m, àngmaqò nøt mvsø̀n rì svng vnà taqkèní táā lúnlv́m, dang vrv̀m kèní tubùm dvbangā lv́m nvng àngmaq svng shóngnøt dvtān lv́m dvkám wegø íe.

Wedø ínø̀wa Gvray dvbùshvng bv̀nlì ò shóngnøt nø jø̀ng jǿngni chvpdvp bǿndaq longe wanø gø dvkám we íe. Yanǿng kaqsvng vjúrøt lv́m àngnǿng wanø̀ mvsvt shìbǿì we taq bóy àngni taqgø téwa vpǿ ringwe ku nvng dvgùng vlwe ku wáshì lúnlv́m tvrà ínø̀ vsvk lvpat vrvm we shòlaqré rì taqkèní gø "Mònggvn àngcì, àngkàn, shaqré shaqtang" kaq vná mvdaq we, Gvray shóngnøt kèní shvla we tvrà rì svng dvtān lv́m íwe dang, Gvray ínø kagǿ svng gø rvwìng nø gur we mv-vl we dang vtàn nø̀ dvkám bǿà wegø íe.

#Pope_Massage