Svrabín koqkámpè Francis taqkèní mòngzø̀lwe tvrà, svmaré rì, shòlaqré rì nvng shvngø̀mré vdòng shvnglutwe vkáng rì dang dvkámwe

Svrabín koqkámpè Francis taqkèní mòngzø̀lwe tvrà, svmaré rì, shòlaqré rì nvng shvngø̀mré vdòng shvnglutwe vkáng rì dang dvkámwe

Gazastan móngdàn, Nur-Sultan taq September 13-15 ni høqshaq wàbǿà we 7 boq waboq mònggv̀n móngdàn vrv̀m shvngø̀mré vrv̀mò vhømwe lìpùngmè taq svrabín koqkámpè Francis taqkèní mòngzø̀l we tvrà, svmaré rì, shòlaqré rì nvng shvngø̀mré vdòng shvnglutwe vko vkángrì dang mòngkà kèní dvkám bǿà wegø íe.

Svrabín koqkámpè taqkèní dvkámwe taq mòngzø̀lwe tvrànø mvdø̀ngni vchvke. Pàwálv́m wani mvjàn shìwvtrì, naqciqriq we shv̀mná shvngo shìwe dangrì nvng vzi vrùng wawe tvrà rì shvngbe nø mònggv̀n móngdàn vrv̀mrì ò vtoq vtipwe tvrà svng zá vtǿp dvzv́rwe gø íe.

Gvray kaq kám vsvngrì taqkèní mòngzø̀l dø mvngushì lúnlv́m dvpvtnø téwa wálún lv́m dvpvt nø we tvrà svng téwa tóng dvzaqshì ràwe nvng we tvrà dvpvt vjúrøt dvzaqshì ràwe dang dvkám bǿà wegø íe.

Cømsaq mòngzø̀lwe tvrà wawe nø shvngbe kø̀mzøp ràwe tvrà tiqlòng íwe taq nøt mvsø̀n vjøngí dvdam shàì we manggá tiqlòng gø íe. Mòngzø̀l we tvrà wawe nø àngnvm àngchang nøt mvsø̀n vjø̀ng kèní bung rawe íratnø̀ mà dvrá we dangrì, vdu vbóngwe tvràrì nvng rìn vrá vko vkángrì mv-vl longwe dangrì svng gvsat shvzǿm ràwe gø íe walòng svng dvkám bǿà we íe.

Svrabín koqkámpè taqkèní wedø mòngzø̀lwe tvrà svng tong lv́m, shvnat mvzørì svng gor lv́m vsvng shvngbe ò vjú lúnshì we tvràrì svng wá dvzaqshì lv́m dvtú bǿà wegø íe.

Wedø mòngzø̀l we tvrà taqgø svmaré rì vbá lv́m gø vchvk tiqlòng ni íe. Mòngzø̀l we tvrà mv-vl wawe taq vpǿ shvring kewe dang, dvsháza shóngnøt nvng vsv̀ng lvpatrì shvzatā we tvrà rì nø vchvk mvdø̀ng taq vbá longe.

Shòlaqrérì kaq gø chvpdvp lvpat rvtø̀rì taqgø, tuqrawe mèpvng rvtø̀rì dvpvt gø mòngzø̀l we tvrà sv̀ng shølshúrì nvng vzø̀m vzvp lv́m tvrà tóngā ràwe íe. Shòlaqrérì wawe nø mòngzø̀lwe tvrà dvpvt ringwe vsvngrì ínø̀ Gvray àngò pv́nmv́n we dvrèrì svng gø roqgvr lv́m bv̀nlì døngjá vlwe rì ni íe. Shvngø̀mré shølshúrì taqkèní gø shòlaqré rì dvpvt paqzí cvnshì lúnlv́m vko vkángrì tvrà tánā ràlonge.

Àngmaq dvpvt mvrø̀lv́m paqzírì zángā mvdaq, àngmaq taqkèní shúnshì rawe kàrì svng táānø̀ àngmaq shóngwámshì we tvràrì svng tøp tøpwa táā lv́m dvtúwe gø íe. Svrabín koqkámpè taqkèní yadangrì svng shvngø̀mré kámnøt tvrà dangrì nvng singnø dvkámwe gø íe.

Àngmaq yv́ngkèní kámnøt tvrà dang sakse wáshì lúnlv́m dvpvt kadvgvp gø roqgvrā ràlonge. Mònggv̀n vsvngrì taq dèni bat høqshaq kámnøt tvrà nvng singnø shvnip shvnvrwe, shat vhǿ:mò we vsvngrì gø gvzà vlwe íe. Àngmaq taq lún vkángrì mv-vl we nvng kámnøt tvrà taq shvnglutwe vkángrì vmvngwe rì vhǿ:mòwe íratnø̀ àngmaq dvpvt dvdamā lv́m vchvk we dang dvtúwe íe.

Svrabín koqkámpè taqkèní màbóngwe kámnøt tvràrì taq vhømnø mvngushì we, dvmv̀nwe tvràrì nø mòngzø̀l lv́m tvrà rì dvpvt we manggá svng diwe tvrà tiqlòng íwerat yadangrì svng kadvgvp gø wádvzaqshì ràwe dang dvkámnø̀ nònggwòn ziwe gø íe.