Svrabín koqkámpè John Paul I nø gvray àngcèrì dvpvt nøt mvsø̀n shagóng shvngbe zíshì vsv̀ng tiqgǿ íwe

Svrabín koqkámpè John Paul I nø gvray àngcèrì dvpvt nøt mvsø̀n shagóng shvngbe zíshì vsv̀ng tiqgǿ íwe

Svrabín koqkámpè John Paul I nø gvray àngcèrì dvpvt nøt mvsø̀n shagóng shvngbe zíshì vsv̀ng tiqgǿ íwe

Vle v́mì we September nv̀mlat lvbán taq Svrabín koqkámpè John Paul I ò lvpat mvshǿl sv̀ng Vatican shvngkà dap kèní dvshvngvtnà.

“Vmè ínø ngà kaqsv̀ng gvray ò shvrúng shú bv̀nlì wàlv́m kadvgvpgø mvshø̀n yvng. Ínìgø àngnø gvray kaq gvzà kámwe rvcángcè tiqgǿ íe. Gvray í ngà sv̀ng ego:ng bǿ:ngà we mèpvngnø ngà ya tvrà ta yv̀nggùng dø̀ng rá:ngà we íe.” Wanø Svrabín koqkámpè John Paul I shø̀n yv̀ngì.

Svrabín koqkámpè John Paul I nø Svrabín koqkám lvpat 34 ni cèwa vl yv̀ng we ínìgø dèni bat taq àngkaq sv̀ng ìshøt vl we vsv̀ng wanø̀ Svrabín koqkámpè Francis taqkèní gø dvkám we íe.

Svrabín koqkámpè John Paul I ò bø̀ng mvdø̀ng nø Albino Luciani ínø̀ Italy móngdàn, Vittorio Veneto Svrado gørwang Santa Maria Del Piave taq shvrúng shú tiqgǿ ku rúng yv̀:ngì we íe.

Svrabín koqkámpè John Paul I taqkèní vtàn yv̀:ngà we taq “ Àngmè tiqmaq taqnø shvrúng shú rìò nøt mvsø̀nrì zángshì we ínø̀ àngcǿ àngcè rì sv̀nggø we nøt mvsø̀n zángā lú:nò we íe wanø shø̀n yv̀:ngì.

Àngmè taqkèní gø àngkaq sv̀ng shvrúng shú lvpat taq gvray bv̀nlì téwa dvzaqshì lúnlv́m kámnøt rì zíā lún yv̀:ngà we dang vtànò we íe.

Shvrúng shú rì wawe nø vsv̀ngrì dvpvt chutcháng we tvrà tóngā lv́m dvpvt gvray àngò dvzv́r rì ni íe. Gvray dvbùshvng mòngkà dvshvng we nø vsv̀ngrì kaq chutcháng lúnlv́m tvrà dvpvt tubùmā we bv̀nlì tiqlòng gø íe.

Gvray àng nv̀ng vsv̀ngrì dvpvt bv̀nlì dvzaqshì we shvrúng shú rì nø gvray àngò dvzv́r shvlá rì íe. Wedø mø:í nø vdè dvpvt wa wáshì we vsv̀ng nø shvrúng shú tiqgǿ ò lvpat taq wá màdu we bv̀nlì rì ni ílonge.

Shv̀nshér we shvrúng shúrì wawe nø zidòng mok døni írà longe. Shvrúng shú wawe nø vsv̀ngrì pvlàcè nv̀ng shagóng kù:ngà lún dvzv́r we v́:aq lv́m mok tiqlòng dø wáshì ràwe íe wanø̀ Svrado Luciani í dvkám yv̀:ngà.

Shvrúng shú tiqgǿ wawe nø vsv̀ngrì dvpvt kadvgvp gø tvlú dvgǿshì shaq íràe. Wedø shvrúng shúrì àngmaqò chø̀m dø̀ngku rì sv̀ng gu:rò nø̀ gvray bv̀nlì rie wawe nø vsv̀ng dø̀ngku rì mvme sv̀ng tubùmā lúnlv́m dvpvt ratnøgø íe wae.

Shvrúng shúrì dø̀ngku màshvzøngshì wedang nv̀ng singnøgø àngí yadø dvkám shaq íe. “Vsv̀ng tiqmaq í dvda:mò wenø we shvrúng shú rì dø̀ngku mà shvzøngshì we nø we shvngø̀mré nø chø̀m dø̀ngku shvzøng shìwe tvrà svng màtoò nø vpǿ òwe dang mv-vl rat íe wawe shø̀n kàrì nø vlé shìwe tvrà rì ílonge.”

“ Yadang nv̀ng singnø̀ shǿn mvyǿ we taq chø̀m dø̀ngku shvzøng shìwe tvrà nø vpǿ vtangwe, shv̀nshér we tvrà ie. Weratnø we dø̀ngku svng vcù:ngò we dø̀ngku vgo àngpè rìínø we dø̀ngku ò bv̀nlì døngjárì sv̀ng rírà longe. Vdè ò chø̀m dø̀ngku, àngcǿ àngcè rì sv̀ng dvkúm dvté lv́m, paqzí cvnā lv́m nvng mvkok lv́m dvpvt kàciq ratshì we íe. Wedøni shvngø̀mre vdòng taqgø rvcángcè rì kaq mvkok lv́m dvpvt shvrúng shúrì taqkèní gø wedø íwe kaciq sv̀ng gvray àng mv́r taq ratshì ràwe íe.

Weratnø shvrúng shúrì nø shvngbe sv̀ng tubùm dvbangā ràwe, shvngbe ò dvzv́r shvlá tiqgǿ ni íràwe bv̀nli døngjá svng riwe íe. Shvrúng shú wawe vya sv̀ng kámshì we nø gvray nvng vsv̀ngrì dvhø dvzv́r bv̀nlì døngjá svng riwe íe.

Gvray àngò vyv̀ng roqshú, shvrúng shú vsv̀ngrì ò lvpat nø Scramento jejú gømla sv̀ng tvleā we bv̀nlì, vsv̀ngrì ò mvrà rì chutā we bv̀nlì rì taq shvrúng shú rìnø dvsháza shóngnøt gv́lshì ràwe gø íe. Shvla we jàng laqyà shvlárì dvtanā lún ràe wanø Svrabín koqkámpè Albino Luceani taqkèní shvdǿm we íe.

Wedø shvrúng shúrì luqtàm lv́m dvpvt vjúrøt dvzaqshì we vsv̀ng nø mònggv̀n vsv̀ngrì kaq døngman we shóngnøt vl rì íe.

Add new comment

3 + 4 =