Svrabín koqkvm Francis ínø lvngcha dvja rvt yvk vhøm bøā we American móngdàn nvng Ganeda móngdàn dvpvt vjúrøt dvbvng we Shvngkà.

Svrabín koqkvm Francis ínø lvngcha dvja rvt yvk vhøm bøā we American móngdàn nvng Ganeda móngdàn dvpvt vjúrøt dvbvng we Shvngkà.

        Svrabín koqkvm Francis taqkèní Tōniò kwurwang mvzan rì rvt Vsvng gønshaq sø'm bø íwe Gaylord kèní móngzøngcerì rvt gvzà nønt mvshøm lvm íbøì we dang Sasvna øp svradopè Jeffrey J. Walsh kaq zíò we jénvn shvngkà kàru taqkèní dvtánòe.

    Gaylord myoq nø Vsvng gorø (4200) vl we American Byīdōngsuq, Michigan Byīne, Detroit ò nvmlù:p lvp taq vl we myoq tiq myoq gø íe. Krvtzøm vhøm bøā we døngku vsvngrì nvng tiqdø nønt yòr vhømìe, wànø dvtánòe. Svrabín koqkvmí shvri we Shvngkà taq lvpat gønshaq mà-vl bø'ì we àngmaq dvpvt, krvtzøm nø dāmá lún bøā rì, dvgá tiq rvgaq svng vzérshì vhømò we Vsvngrì nvng tùbùm dvbvng vhømò rì dvpvt gø vjúrøt dvbvng we dang, gvrayí nø shvngbè shagóng nønt mvsøn mongzøl lòng vtōshì lúnlvm dvpvt vjúrøt dvbvnge wànø dvkvme. Vlē a:mi we nár vdòng taq bø'n búng bø'ì we nvmbøng mvrøme ínø Vsvng vní gø' gø lvpat gønshaq vmv'ng a:mì nø (40) jvn gø' dāmá lún bøā we íē. Svmi sømri tvrà rì shvngbe gø shø' ké bøā wàe.

         Ganeda móngdàn taq gø nvmbøng mvrøme gòng we dang

Wè mèpvng jénvn shvngkà tvyø taqkèní kàru tiqgøm  svng  svrabín koqkvmpè í nø ganeda móngdànò Catholic Svrado mvdòo àngké svradopè Raymond Poisson kaq shvri bøā.Ganeda móngdànò tì bo tut taq gø nvmbøng mvrøme gòng nø Vsvng shì we gø bø'n bø'ì nø, dvre rì zø'm we gø mvmè vl bø'ì. Jénvn shvngkà taqkèní svrabín Koqkvmí nø nvmbøng mvrøme rvt dvshà mvhø't vhø'm bøā we mongzøngcerì, Gvray yv'ngkèní nønt shvløm we vtoshì lúnlvm rvt nvng mà-vl bø'ì we vsvngrì àngmaqò pvlàcè rì gø gvrayí dvshá zā we vtoshì laqlúnò wanø vjúrøt dvbvng nø shøn bøā we íē.

       Svrabín koqkvm nø àngò jénvn shvngkà kàru taq vkvt dø Tōniò kwurwang nvmbøng mvrøme rvt zá vhøm bøā we angnvm angchvng rì íwe Svrado rì kaq svng nonggùn zi kà shøn nø vjúrøtna weí shvmvn dvgøng Kà zí bø'à. Móngzøngcerì nvng vsuyaq mvdò taqkèní gø dvshà mvhø't vhø'mò rì kaq svng tùbùm dvbàng lúnlvm dvpvt røtnímshì bø'ì we íe.