Svrabín pè Francisí Ash Wednesday Mass taq àngde ni àngde, Gvray nvng nøngmaqò vnvmchvngrì nvng singdø dìngman lòng svng dìlvm rvt shøn nø dvkv'm bø'ì.

Svrabín pè Francisí Ash Wednesday Mass taq àngde ni àngde, Gvray nvng nøngmaqò vnvmchvngrì nvng singdø dìngman lòng svng dìlvm rvt shøn nø dvkv'm bø'ì.

 Svrabín Koqkvmpè í nø " nøngmaqò lvpat taq mà-vl mvdaq íwe dìngman dvrá, Vpè Gvray gvsang tiqgø'wā Gvray ínø nøngmaq nø àngò wur laqmu taqkèní wa í shàè " wànø nøngmaq kaq shvdømè wā svrabín koqkvmí shøn bø'à.Catholic Lenten rvtø nø Ash Wednesday taqkèní pvngshì nø shànshér we nár vbí ni dørøm rvtø taq dvtv'ng bø'à.

 Àngde ni àngde vl lúnlvm nvng sømla hàng Noqngøm we bvnlìrì shvngbe svng gwúrlvm rvt shvngbe svng go bø'à we íe.Vm-aq vnatshì rvtø nøngmaq nø Gvray kaq vlømshì nø " Ídømshì dang svng gwúrlvm rvt " dvdvm ra we rvtø íe.Svrabín pè nø Gvray gvsang kaq lolvm rvt, Gvray gvsang nvng nøngmaqò vnvmchvngrì kaq svng vrá vtv'ng lúnlvm dvkvme.

 " Lvpat nø Gvray gvsang nvng nøngmaqò pèmèmaq taqkèní nøngmaqí vtoshì lúnì we v-toq v-tìp we tiqlòng íe. " Nøngmaqò v-toq v-tìp we dang svng kadvgvp cúnshì nø àngshvr àngshvr wáshì lúnlvm dang dvkvme.

 " Wervt vm-aq vnatshì rvtø nø Gvray gvsang nvng tiqdvr vsvng rì nvng nøngmaqò v-toq v-tìp we dang svng vrá vrvngshì lún nø, vjúrøt wèò mongzøl lòng nø nøngmaqò mvsøn nvrøm svng tánà nø àngde nø àngde vlømshì yv'ngkèní búng we jèjú ìshøt rvtø íē " wā svrabín koqkvmpè Francis kèní shøn bø'à.Svrabín pè Francisí nø Tong kring Catholic nár nī svng nár, vjúrøt we nvng vlu láshì lòng svng dvnung lvm rvt røtnímshìe.

 " Vlu lakúr we, Vjúrøt we, vm-aq vnatshì rì nø yv'ng vnvplvm rvt wā vl we mø-í, nøngmaq nø Jø'ngjø'ngni cvndvgømì lòng íe. Gvray gvsangò angcø àngcèrì, vnvmchvng rì, tasvng tale dvtán lún ràe " wā svrabín koqkvmí mvdøng mvdaq dvkvme.

 Hkristu Wūrgang svng yvng nø nònggùn vl we mvsøn nvrøm kèní nár shvláò dvkv'm Kà rì svng cvndvgøm weí " lvngdøm taqø àngde nø àngde zúnlvm ínø Vkangpè nø téwa dvbù nøntshøm weí nøngmaq svng yv'nglún lvm í lúngè."