Tìløp kámshì bøwe rvcángcèrì shvngbe nø shvngø̀mré ò àng dvgàng tiqlòng ni íbøì

Tìløp kámshì bøwe rvcángcèrì shvngbe nø shvngø̀mré ò àng dvgàng tiqlòng ni íbøì.

Svrabín koqkámpèí dvtú we taq tìløp kámshì bøwe nø dvgá tvrà nvng màbóngwe shvngø̀mré ò àng dvgàng tiqlòng ku ívmwe dang shvdǿm we íe.

Dvbùshvng mòngkà taq vtàn ráà wenø mvsat shaq íwe vsvngrì dvpvt wa mǿí Kàngpè Yesu mèpvng cv̀nwe dvzv́r rì, àngmaq ò kámnøt kèní apnúngshì we døni bat vrvm taq tìløp kámshì vsvngrì gø kámnøt tvrà tiqdang nvng tiqdang màbóng we ínø̀ Gvray àngò ìshøt jejú rì kèní àngmaq ò shvngø̀mré svng mvkok nø vrang shìwe íe.

Dvbùngshvng mòngkà dvsher lv́m shvrúng nøt zangwe vsvngri nø mònggv̀n ò tvràrì svng gur nø Kàngpè Yesu ò shvngø̀mré sasvna nvng tiqdø wáshì nø jór nònggwòn jejú vtoshì lúnò we íe.

(II) boq wa boq Vatican lìpùngmè taq shvngø̀mré Sasvna nvng singnø̀ shvngøt dvtú we taq Yesu Kristu svng mvsháò nø màtoò we vsv̀ngrì mvdàm Yesu kristu nvng shv̀nshér pvlàcè dvhø̀ vzø̀m nø shvngø̀mré dvpvt Sasvna bv̀nlì wawe tvrà taq vbá we íe. Welòng nø mònggv̀n vlevm we àngni høqshaq Gvray àngò shóngnøt svng dvsher lv́m tvrà gø íe.

Sasvna bv̀nlì taq dvzv́r shvlá bǿnlún lv́m dvpvt nø tìløp kámshì bøwe vsv̀ngrì shvngbe svng goò nø bv̀nlì døngjá ziwe gø íe. Weratnø we vsv̀ngrì shvngbe nø Yesu kristu døni lvpvt apnúngshì taqsórí Sasvna bv̀nlì taq dvzaq shì lv́m dvpvt gø íe.

Kám vsv̀ngrì shvngbe nø Kristu ò døngmvn we mòngkà nvng welòng kèní vrang shì bøwe kùngàrì rì nvng vsvngrì ò vjú dvpvt nvng chø̀m dø̀ngku vrv̀m rìò vjúrì dvpvt gø dvdamshì sórí shvlawe nvng àngshv́r íwe tvrà rì kaq svng wáā lúnlv́m dvpvt ègoì we íe.

Tìløp kámshì we ò jejú gømpaq kèní shvngø̀mréò lóngdø̀ng wáshì lv́m vchvk wegø íe. Welòng nø shvngø̀mré ò Sasvna bv̀nlì taq vdè ò bv̀nlì døngjá rì taq dvzaq dvkángshì lv́m nvng tasvng gø tubùmā kelv́m dvpvt íe. Tìløp kámshì bøwe rvcángcè rìnø Kristu ò dvbùshvng bv̀nlì taq koqkám dvcì, kàdvtutshú rì dvcì tiqlòng ku lvpvt zíshì nø apnúngshì ràwe gø íe.

Svrabín koqkámpè taqkèní dvtú we taq kadø íwe vsvng, ka shvrà taq èvlwe vsvng ínìgø Kristu àngò dvbùshvng bv̀nlì taq apnúngshì lv́m rà vchvk we dang shvdǿm nø nònggwòn ziwe íe.

Gvray í ezi bøwe jejú gømpaqrì dvpvt àngkaq svng vrá dvgùng shvring lv́m nvng oqà wawe nø vdè ò shvngø̀mré taq Sasvna bv̀nlì kèní dvzømshì wegø íe wanø tìløp kámshì bøwe vsv̀ngrì dvpvt Svrabín koqkámpè Francis taqkèní shvdǿmnø̀ nònggwòn ziwe gø íe.