Vjúratshìwe nø shvngø̀mré dvpvt dvbùshv̀ng mòngkà sasvna bv̀nlìrì sv̀ng tubùmāwe íe

Vjúratshìwe nø shvngø̀mré dvpvt dvbùshv̀ng mòngkà sasvna bv̀nlìrì sv̀ng tubùmāwe íe

Svrabín koqkámpè Francis í vtànò we taq noqngø̀m vjúrøtshì wenø nøngmaq kaqsv̀ng vlíng vpo dvzv́r lúnnø̀ kàngpè Yesu ò tvrà sv̀ng tánāwe gø íe wae. Vránø shv̀nshér pè Pius V ò vjúrøt kàrì sv̀ng cv̀ndønglv́m dvzaq dvkángshìwe, téwa rosari vjurøtshìwe nv̀ng dvzv́rìò kámnøt tvrà sv̀ng shvngø̀mré kaqsv̀ng kadøwa tvrà shølā we dang dvtú nø dvkám we íe.

Shvngø̀mré vdòng svradorì, shvrúngshú rì nv̀ng shvngø̀mré vsv̀ngrì shvngbe gø àngnvm àngchvngrì dø vzø̀mnø̀ vtoqvtip wedang nvng shvngø̀mré mèò bv̀nlì dvlàrì angdang dang taq vháng vlún lv́m dvpvt gvray yv́ngkèní jejú ìshøt lúnlv́m dvpvt wanø Svrabín koqkámpè Francis taqkèní dvkámwe gø íe.

Spoleto-Norcia taqkèní shòlaqré noqngø̀m vsv̀ngrì kaqsv̀ng dvkámwe taq Kànġpè Yesu kèní tìløp kámshì we Scramento sv̀ng kámshì we nø rvcángcè wawe nv̀mlat mvpv́ng kámnøt tvrà tiqlòngni íwe dang Scramento wawe jejú gømla nø dvzv́rrì ò nv̀mlat kámnøt tvrà dvpvt ìshøt tiqlòng ínø̀ wedø tìløt kámshì bøwe kvt vdèò bø̀ng vzàng lvp taq shv̀nshér we vsv̀ngrì ò bø̀ng tiqlòng lòng sv̀ng zíshì lv́m íwe dang vrá tiqkvt shvdǿmā we íe.

Svrabín koqkámpè taqkèní shòlaqré rì kaqsv̀ng nàmaqnø nvmnǿng vnvnshìwe rat gvyaqshì bǿìwe rvgaqrì kèní ètuq ráshàwerat nàmaq dvpvt rvgaq mvdàmø vrangshaq ngàngdøngwe chø̀m tø̀ngnø tiqlòngni rà vchak we dang síngshá ràe wanø dvkámwe gø íe.

Namaqnø rvcángcè rìò lvpat sv̀ng vrangshì lúnlv́m dvpvt nø vsvk cúnshìwe lóngdø̀ngrì døni wáshì lúnlv́m jejú sv̀ng røtshàì. Vdèò chø̀m døngku vdòng, shvngø̀mré dvpvt, rvcángcè lvpat dvpvt lóngdø̀ng wáshì lúnlv́m vjúrøt shìlv́m wàì wanø Svrabín koqkámpè Francis í shvmán dvgǿngkà nv̀ng vrìng bǿà wegø íe. Wedø lóngdø̀ngrì dø wáshì lúnlv́m dvpvt nø shv̀nshér pvlàcè ò kù:ngà yv́ngkèní wa bǿndaqwe íratnø̀ we shv̀nshér pvlàcè ò jejúrat tìløp kámshàì we tvrà kèní Gvray àngò àngcèrì wawe jejú ìshøt sv̀ng ngàngdøng dø vtoshì lú:nìwe gø íe wanø dvkám we íe.