vsvk té bǿì we vsv̀ngrì nø mònggàn vsv̀ngrì dvhø̀ taq dvpǿ shvdún mvlúnshì we vsv̀ngrì ni íe

vsvk té bǿì we vsv̀ngrì nø mònggàn vsv̀ngrì dvhø̀ taq dvpǿ shvdún mvlúnshì we vsv̀ngrì ni íe

Vatican kèní shvngø̀mré rì, chø̀m vsv̀ngrì vsv̀ngrì ò lvpat vsvk nvng singwe róng bv̀nlì àngkàng Cardinal Kevin Joseph Farrell nø Catholic shvngø̀mré rìò pvlàcè vjú dvpvt tuqrawe 3 boq waboq mònggàn vsvk te nø svrǿng bǿì we vsv̀ngrì ò bóy àngni dvpvt dvgǿ shì we vsv̀ngrì kaq mvrà vroqā we nvng àngmaq kaqsvng shvmv́n dvgǿngā lv́m røt shún bǿà wegø íe. 
we mònggàn vsvk tenø svrǿng bǿì we vsv̀ngrì ò àngni svng July 23, 2023 ni taq wàlv́m dvgǿshì bǿì wegø íe. we bóy àngni ò kà vgo kèní (His mercy is from age to age) àngò dvsháza shóngnøt nø dvciq lvpat vl longe wanø íe. yalòng kà vgo svng nø Luka 1:50 kèní lúshì wegø íe. 
Mvrà rì kaq svng vroqā we jejú vtoshì lúlv́m dvpvt dvgǿ shìwe
ya dang nvng singnø noqngø̀m tvyø rì taq vbá lúnwe taqkèní wa mǿí, mvrà vroqā we jejú rì svng vtoshì lúnlv́m dvpvt àngwà dø dvgǿshì ràwe gø íe. wedø dvgǿshì ràe wawe taq 1. mvrà vroqshì we Scramento svng vto shì lv́m, 2. Missa noqngø̀m tvyø rì taq zidòng mok svng vtoshì we, 3. Svrabín koqkámpè àngò dvdamshiwe àng mvtúrì dvpvt Yesuí shvngøt we vjúrøt kà nvng oqà wawe vjúrøt kà rì svng røt dvzaqshì lv́m wáshì ràwe dang dvtú we íe. 
Mvrà vroqshì we jejú svng vtoshìwe taqkèní mvrà svng vroqā we jejú svng vtoshì lúnlv́m ílonge.
wedangrì nvng singnø vdèò mvrà rì kaqsvng vroqā bøwe mèpvng we mvrà rìò dan rì svng kámshì ràwe tvràrì svng gø vroqā we íe. vdèí vléshì bøwe mvràrì vrv̀m dvpvt mvrà dan kámshì ràwe tvrà vle. we mvrà dan rì svng rvgaq mvdàmø shvrán mèwaqshì bøwe kvt muqlàng taqlvpø gø welòng dvpvt shvrán wedøni waqshì ràlonge. rvgaq mvdàmø yadø íwe mvrà vroqāwe jejúrì svng vtoshì lv́m dvgǿshì wenø vdèò mvràrì shvngbe svng shvng shvng wa vroqā lúnwe gø íe. 
wewa mvtaq vdèò àngcì àngkàng maq shaqré shaqtangrì svng dinø vriqā we, àngmaq kaq svng tubùm dvbangā we, dvshà mvhøtlv́m vhǿmò rì, shagóng mvshiq mvshàn we, hí wur dvciqwe vsvngrì kaq dang àngpv̀n pv̀n taqkèní tubùm dvbangā we vsv̀ngrì kaq gø we jejú rì svng vtoshì lún dvzv́r wegø íe.