Vyàng roqshú tiqgø à:ngò vyàngré rì dvpat røtnímā we kàru

Vyàng roqshú tiqgø à:ngò vyàngré rì dvpat røtnímā we kàru

Ukraine móngdàn nvng sing nø we móng ò dvjà svng èyvng vtnò dvgvp nøngmaq mvsøn nvrøm taq vtang kèní nøt yòl lvm íbøì. Krønmvng gvsa tvrà dang kèní gø àngboq boq vtoq vtip we wáshì bøì. Yadang nvng singnø mònggvn vsvngrì shvngbe nøt mvbyo lvm vhøm shì ráì. Tiqlvp ò vjú dvpat wa yà:ngì nø mònggvn mòngzøl tvrà svng vtøp we, svre dvkutwe bøn dvzvŕ lú:ngà.
 
Røtnímshì mvyø we taq mòngzøl we tvrà ò àngkàngpè íwe gvray kaq dvdam shàì nø dvtøp shàì. Gvray àngnø mvjàn dvbu:ngò we bvnlì svng mvshóng shì. Gvray nø bashà rì dvpat wa mø:í, pvnmvn dvrèrì shvngbe ò àngkàngpè íe. Kàngpè gvray nø àngnvm àngchvngrì ò shóngnøtí vzøm we tvrà svng wa shóng wámshì nø tvsvng shvngo vtù kewe bvnlì svng mvshóngshì.
 
Weratnø wedø íwe tvrà taq singwe vsvngrì shvngbe kaqsvng dvkám mvyø:ngwe nø móng vsvngrì kaq dvtut mvhøt dvzvŕ we bvnlìrì ídángte svng nvr vdu bøì. Tiqdø vzøm nø mòngzøl dø vlwe móng vsvngrì kaq vkang dvzvŕ we bvnlì nø svngpvn vko vkáng, móngdàn Ubvdi rì svng gø vléshì we íe.

Nøngmaq kagø ínì gø Gvray kaq kámwe vsvng, mvkám we vsvngrì shvngbe kaqsvng dvtú mvyø:ng wenø Yesu Kristu nø màshvla we tvrà svng shvlawe tvrà í dáng lún lvm nvng welòng dvpat jór nvngòn nø vjúrøt shìwe nvng vm-aq vnvtshì nø vjúrøt dvzaq shì ràwe íe. Tuqrawe March 2 ni kèní, vm-aq vnvtshì nø vjúrøt shìràwe rvtø làngcha dvhø weni tiqni vdòng shvngbe nø vm-aq vnvtshì nø mònggvn mòngzøl lvm tvrà dvpat vjúrøt dvzaqshì nø rvtø zíshì lvm shvngbe kaq svng røtním shøngnø vrìng vtnìe.