Yàmbvn bvn vsvngrì kaq vtoshì we nø vsvng màngpòngrì nvng shvngømré svng téwa vháng vlún dvzvŕe

Yàmbvn bvn vsvngrì kaq vtoshì we nø vsvng màngpòngrì nvng shvngømré svng téwa vháng vlún dvzvŕe 
      
Latin America móng svng èyàngvtnò dvgvp yàmbvn bvn vsvngrì kaq vtoshì we, àngmaq svng tubùm dvbangā we nø gvray ìshøt tiqlòng døni vháng vlúnwe tvrà tiqlòng íwe svng yánglún shìe.

Wedøni we móng vsvngrì kaq zìdang dvhángā lúnwe tvrà gø íe wanø Svrabín koqkámpè Francis í mònggvn yàmbvn vsvngrì kaq tubùm dvbangā we mvdò svng dvtú nø nvnggùn zí bøà we íe. We mvdò nø Italy móngdàn Catholic svrado àngké ò øpshøl we vdòng taq vlwe gø íe.

November 9-12 ni Rome myuq ø Europe móngdàn Italy dvcìrì nvng Gvray dvbùshvng bvnlì wawe  vsvngrì dvpat wanø lìpùng mè wà bøà we íe.
            
Svrabín koqkámpè Francis taq kèní mònggvn yàmbvn vsvngrì kaq vtoshì ràwe dang nvng singnø 4 dang kèní dvtú bøà. We 4 dang svng cvndøng we mvvl long dvgvp màshvla we tvrà svng vlíng vpo dvzvŕ sháò we gø íe. 2016 nøng March 22 ni taq Brazil, Belgium, Zaventem nvmbøng shø nvrshì shvrà taq bùm 3 boq poqwe bøn yà:ngì. Welòngnø mònggvn yàmbvn vsvngrì kaq shvlá wa vtonø tubùm dvbangā we bvnlì mvwáāò weí we yàmbvn cvmré rì yáng kèní dvbung ráà we íe wae.
            
Yàmbvn vsvngrì nø Europe móngdànrì nvng àngmaq shvnvrshì we shvngømré rì dvpat ìshøt tiqlòng ni íe. Àngmaq kaq shvla dø vtoqshì nø tubùm dvbangā we ínìnø vrvm vrá lvm tvrà svng shvzat lú:ngòe. Yalòng nø dvzvŕ rìò dvbùshvng bvnlì tiqlòng gø íe.

Yadang nvng singnø Svrabín koqkámpè Francis í shvnshér vsvng tiqgø íyàngì we shvrúng shú St. Francis Xavier Briny ò lvpat mvshøl kèní shvbóng nø shvdøm we íe. Àngsvng 1946 nøng taq shvnshér vsvng tiqgø ku dang yàngà nø American móngdàn vsvng rì kèní nvmlat shvnshér vsvng bøn ráì we gø íe. Àng taqkèní American móngdàn svng yàmbvn bvn we Italy móng vsvngrì dvpat pvlàcè dang roqgvrā lvm dvpat Yesu Kristu ò jà nvrøm Sister mvdò svng poqpvng yàngà.
 
Yalòng lìpùng mènø Europe móngdàn svng yàmbvn bvn we Italy vsvngrì dvbùshvng bvnlì taq téwa dvzaq shì nøt v:lvm, dvpat wawe manggá kèní wáshì we gø íe. Weratnø yàmbvn bvn vsvngrì kaq shóngnøt gvlshì lúnlvm, Europe móngdàn rìnø we vsvngrì shvngbe dvpat shvnvr shìrà shvlá tiqlòng bøn lúnlvm nvng gvray dvbùshvng mòngkà dvyø svng gø àngdè tuqvm we shvrà vrvm taq wun lúnlvm dvtú nø nvnggùn ziwe íe.