Zìlàngré rì taqkèní Svrabín koqkámpè svng wur dvchøp gømpaq zíò we

Zìlàngré rì taqkèní Svrabín koqkámpè svng wur dvchøp gømpaq zíò we
Svrabín koqkámpè Francis nø mònggv̀n zìlàngré àngni dvpvt dvzøm shì bǿì we shòlaqré rì nvng vhøm nø nònggwòn zi kà dvmv̀n bǿì. 
We lvmvng tvyø taq zìlàngré rì taqkèní dvsháza shóngnøt rà vchvk we làngré tiqgǿ yv́ng svng dinø̀ àngò bø̀ng dímshaq íwe wur dvchøp tiqlòng svng Svrabín koqkámpè kaq zíò dá:ngí welòng svng we mònggv̀n zìlàngré àngni la taq dvchøpā lv́m røt nímshì nø zíbǿà wegø íe. 
Wekvt zìlàngré rì taqkèní svmaré vní gø Svrabín koqkámpè vzàng kaq di nø we wur dvchøp svng àngò wur taq dvchøpā bǿà we íe. 
We svmaré mè taqkèní Svrabín koqkámpè kaq vtànò wenø nøngmaqí cìróng rì, tong rì, vsvk tébǿì we vsv̀ngrì, shagóng mvshiq mvshàn we vsv̀ngrì, hí wur dvciq we vsv̀ngrì kaq dìì nø àngmaq nvng nøngmaq shvngbe tiqdø v̀lì we dang we vsv̀ngrì ò bø̀ngrì svng we wur dvchøp taq dímshaq íwe dang welòng nø àngmaq kaq shóngnøt dvtanā we gømla tiqlòng ku mvsat shìwe íwe rvt welòng svng mònggv̀n zìlàngré àngnila døp taq wur taq dvchøpā lv́m shúnshì bǿì wegø íe. 
Svrabín koqkámpè Francis taqkèní àngmaq svng nònggwòn ziwe mòngkà taq Gvray í nø nøngmaq kaq svng tiqgǿ vrv̀mò bø̀ng taqkèní egò ìnø we bø̀ngrì taqkèní mònggv̀n svng dvcøp shvnvp lv́m kù:ngà rì èzíìe wae. Wedø mònggv̀n svng shvnvp lv́m wawe gø nøngmaq shvngbe taq mvpv́ng kù:ngàrì lúnshìe walòng svng gø síngshá ràlonge. Pàwálv́m wani Gvray àngmv́r taq nø nøngmaq tiqgǿ vrv̀m nø vpǿ ringwe vsvng rìwa íshàe wanø dvtú bǿà wegø íe.