2021 nøng mònggvn yàmbvn vsvngrì nvng dvshá mvhøq vsvngrì dvpat Svrabín koqkámpè Francis taq kèní shvlang kàru

2021 nøng mònggvn yàmbvn vsvngrì nvng dvshá mvhøq vsvngrì dvpat Svrabín koqkámpè Francis taq kèní shvlang kàru

We shvlang karu taq àngò nøt bumwe dang nvng àngí dvdamò we tvràrì svng vruò nø tvnùng bøà we íe. Àngshøn we taq yadø mònggvn taq svre dvkéwe dvjáng zønli vkøn we vdòng mònggvn vsvngrìí yvklvm shìwvtrì gvzà vhømìe ínìgø tiqtong taq nø nøt løm løm wáshìnø dvsházanø vmangwe vsvngrì gø vlwe svng yánglún shìe.

Weratnø ya nøngò mònggvn yàmbvn vsvngrì nvng dvshá mvhøq vsvngrì dvpat dvsháza shóngnøtí tubùm kéì wawe kà vgo vdòng taqkèní dvtú mvyønge. Pàwálvm wani nøngmaqò lvpat shvngbe nø vsvngrì dvpat vjú ziwe ílúnlvm dvpat íe wae.

Gvrayí nø àngò bashàrì svng àng nvng vbóng dø pvnmán yàngshà we íe. Àngmaq svng ìshøt gøzinø vzìnglvm dvpat vmíng vkáng zíshaq íwe íe. Wedang nvng singnø nvmlat nvmpvng 1:77-28 taq Wekvt Gvrayí Ang shø̀ngmang í dv̀ngwa vsvng má:nòe. Gvray shø̀ngmang døni cà:nò nø A:ngí sv́ngzàcè má:nòe. A:ngí lvngàré nvng svmāré má:nòe.

m 28 Wekvt Gvrayí angní svng a:lò we nø, “Nàníí angcǿ angcè shèzatshò nø, leq nàzìng lóngshì. Rvgaq tø̀m svng dv̀n dèzǿngshò nø øp leq dv́ng lóngshò. Nvmukdvra dø̄myùng taq lunglungzì we ngārì mvdv̀mø gø, muqlàng rām calóng cācø̄nrì mvdv̀mø gø; rvgaq mvdv̀mø gø̀nshaq vl nø vngvtshì pv̀n í dv́ngte mvdv̀mø gø leq øp leq gø̄mshò,” wa nø Gvrayí angní svng shvmán dvgǿ:ngòe. Gvray àngí pvngmvnwe taq vshømgø tiqgóng gvray døni tiqgø nvng tiqgø màbóngwe ínìgø tiqlòng taqwa vzøm we svng shøn mvyø we íe.

Bashàrì taq mvra vléshàì we ínìgø àngnvng tiqdø vrá vhømlvm dvpat nøt vwángshì lúnwe tvrà svng tóngā ráshà we íe. Yohán 17:21 taq Ngà nø Nàí dèzv́r dakngà we svng rvgaqí kv́mlv́m rvt, angmaq shvngbe nø tiq lòng wa ívm nø; Vpè Nà nø Ngà vdòng taq èv̄l nø, Ngà gø Nà vdòng taq vl dø, angmaq gø Nøngmaq vdòng taq v̀llv́m dvpvt Ngà røtne. Wanø vru shaq íwe svng gø mòngkà taqkèní shvdøm nø nvngòn ziwe íe. Yadø vsvngrì dvhø vzømwe lòngnø shóngnøt mvchímwe, vvsvng kaq vtùwe nvng dvcì rvwìngwe, kadø íwe bvnlìrì taq ínìgø pàti mvlan we vsvngrì ratnø vnøn dvzvŕ:ò we gø íe.

Jøng jøng taq nøngmaq shvngbe nø shøchøm tiqlòng taq tiq tvrà svng dì ì wewa íshàe. Svngpvn dvcìrì, kámnøt tvrà,tiqmóng nvng tiq rvgaq wanø rvwìng kelvm mvvl. Reratnø yanøngò mònggvn yàmbvn vsvngrìò àngni taq 2 dang kèní dvtú we íe.

Welòng nø Catholic shvngømré rìsvng dvkám we mòngkà nvng mònggvn svmarérì nvng lvngàré rì kaqsvng dvtú mvyø we íe. Pàwálvm wani vsvng shvngbenø nøngmaq wawe kà vdòng taq shóngnøtí vzøm lvm svng dvkám we íe.