Gvray nvng tòniò dvrá svng shóngshìwe nø rvcvngcè rìò lvpat taq mvdøng gvlshì ràwe tvrà

Gvray nvng tòniò dvrá svng shóngshìwe nø rvcvngcè rìò lvpat taq mvdøng gvlshì ràwe tvrà íe. Vle vmì we lvnán ni taq Svrabín koqkámpè Francis taq kèní shvngømré rìsvng shvdøm dvkám we mòngkà taq kàngpè yesu nø angaq góng nøt mvsøn shvngbe kèní kámlvm shønyàngì we dang kèní tvnùngvtnàwe íe.

Mvdøng vchyak we kàciq vní lòng taq nøngmaqò cvndøng dvrárì nvng tòniò dvrárì nø cvndøng lvm kadøni rvzaq we ínìgø cvndøng nø welòng taq zømshì ràwe nvng dvsháza shóngnøt wawe nø gvray nvng bashàrì dvhø taq tasvng rvwing we mv vl lvm dvkám we íe.

Svrabín koqkámpè dvtut shønwe taq "yalòng nø kàngpè yesuí shvngøt dvtú we taqkèní tiq dang ínø nøngmaq shvnvng taq vl we vsvngrì kaq shóngnøt mà dvtanshì we nø Gvray kaq kámwe nøt vjøng mø:í" wanø shvdøm bøà we íe. Yarì shvngbe nø gvray shvnshvŕ kàru jømciqrì taq vtán shaq íwe íe. Gvray kaq shóngshì nø kámwe dang svng vjúrøt shìwe, yesu angò shagóng svng vpø shvring nø kámshì we kèní dvtan shìwe íe.

angdè shvnvng gùr gùr vsvngrì dvhø angnvm angchangrì ò shóngnøt dø wanø gø shønlún shìwe ínø tiqdá vsvngrìò kà svng táā we, dvtit tvle we nvng mvkok we rì gø vbá we svng vtàn bøà we íe. Gvray dvbùshvng mòngkà taq yesu nø nøngmaq svng dvciq lvpat cúnshì we lvpat nvng shóngnøt chøm svng dìlvm tvrà wáshì we ínø wedø íwe shóngnøt tìwàng gø kàngpè angni íwe svng vtànò we íe.

Nøngmaqò lvpatrì vlíng vpo shàì we nvng shèrnø dvgùn vlwe tvrà nø nøngmaqí tiqdá vsvng kaq kadángte shóngnøt zíshì lúnìe walòng taq yánglún shìe. Nøngmaqò dvsháza shóngnøt rìnø vnvmchvngrì dvpat bángkà gvraqā ìwe ínìnø kàngpè yesu angí nøngmaq svng dèkám yàngshà dø angmè pvng cvnshúrì bønlún lvm tvrà vsvr lungwe svng Svrabín koqkámpè Francis taq kèní tvnùngvtnàwe íe.

Kàngpè yesuò dvsháza shóngnø nøngmaq mvdàm taq luqpøn we dø tiqdvchá angí nøngmaq shvngbe svng dvbùshvng bvnlì taq zømshì lvm ègoì e wanø Svrabín koqkámpèí vrìng bøà we íe.