Gvray shvnshér kàru nø vsvngrì nvng gvray dvhø vtoq vtip we shvra tiqlòng niíe.

Gvray shvnshér kàru nø vsvngrì nvng gvray dvhø vtoq vtip we shvra tiqlòng niíe.

Gvray shvnshér kàru taqvru shaq íwe Gvray àng nvnggøp kàrìnø lóngbin nvng lèga mvdàmōwa vrunø mvzøng lvm dvbat wamø:í. Vjúrøtshì vsvngrì dvpat zømdàng lvm dvpat gø íe. Àngò mvsøn nvrøm taq àng nvnggøp kà taqkèní àngshí àngwvtrì lúnlvm dvpat íe wanø Svrabín koqkámpè Francis taq kèní dvkám bøà.

Gvray shvnshér kàru wawe nø nøngmaq gø vrvm dvpat vru shaq íe. Vjúrøtshì we nvng singnø Svrabín koqkámpè Francis taq kèní dvtøp paqzí ziwe taq Gvray mòngkà svng rønø vjúrøtshì ràe pàwálvm wani we gvray àngmòngkà íwe shvnshér kàru nø vsvngrì shvngbe dvpat vrushaq ínø Gvray àngmòngkà svng ziwe íe.

Yalòngnø rvcángcèrì ò lvpat taq vhøm shaq íràlonge. Àngdè lvpat taq àngkvt kvt tálún:ìwe àngmòngkà taqkèní nøngmaqsvng dvshvt nø ègoìwe, nøngmaq lvpatrì svng gálòng jejú svng vtoshì lún:ìwe, síngrál nøt, zitnøt svng lún:ìwe gø íe.

Weratnø cúnshà:ì we rvtø àngnirì taq àngò mòngkàrì svng vtoshì, nøt mvsøn kèní dvtøp shàìnø àngò mòngkà dvyø svnggø nøngmaq lvpat taq dvshvng lvm wàì. Rvcángcèrì nø gvray àngò chøm íràwe Vjúrøshìwe taqkèní gvray àngmòngkà nø tiqkvt vrá cúnshì ráì.

We àngmòngkà svng lúnlvm dvpat nø nøngmaq gø vrvm nø àngò chøm wáshì ràe. Wedø ínø wa we àngò mòngkànø àngdè kayáng etuqvmwe, we shvràrì taqni vsher:vme. Rvcángcèrì mvlúngka taq gvray àngnvng singwe síngrál nøt, rvwvlnøtrì shvnshér kàru svng mvdinø Gvray àngnvng wa vhøm mvyøe.

Gvray àngò mòngkàrìnø shvnshér kàru taqvru we svngnø àngmaqí síngsháòe.we shvnshér kàru taqkèní nøngmaq svng gálòng èzíì wenø jejú gømpaq tiqlòng niíe. Gvray mòngkà svng èrøò dvgvp gø mvdàmrvm wa rønø shvle lvm mø:í pàwálvm wani gvray shvnshér kàru svng røshìwe nø døngnøt mvsøn nvrøm taq gvray àngnvng vhøm lún:ì we rat íe.

Shvnshér kàru tashìwe nvng røwe Rvcángcèrì lvpat taq vjúrøt shìwe tóngnø jømciqrì taq zømshìweí vjúrøt shìweí pvngshì ráì. Jømciqrì svng èrø bøò we vsvng tiqgø taq we mòngkàciqrì svng vrá dvtøpnø dvdamlvm írae. We kvt we mòngkàciqrì taqkèní vjúrøtshì we svng wálúnò we íe. Wedø mòngkàciqrì nø nøng maqkaq kadø shøn mvyø we, vlíng vpo dvzvŕ mvyø we tvrà svng síngshá dvzvŕ we íe.