Kàngpè yesu nø vpè Gvrayò shóngnøt svng nøngmaq dvpvt vtánāwe gálòng íe

Kàngpè yesu nø vpè Gvrayò shóngnøt svng nøngmaq dvpvt vtánāwe gálòng íe

Lvbán vrvmò lvbán ninø shvngømrérì nvng tiqdø Angelus vjú røt we taq Kàngpè yesu nø vpè Gvrayò shóngnøt svng nøngmaq dvpvt vtánāwe gálòng íe. We gálòng svng nøngmaq shvngbeí vto ràwe svng dvtú bøà we íe.

Shvngømrérì vm-aq vnvntshìnø vjúrøt dvzaqshì ràwe làngcha 4 lvbán wa lvbánò lvbán nitaq Kàngpè taq níshàìnø mvrà vroqāwe svng røtshàì wanø Svrabín koqkámpè Francisí dvtú bøà. Mvrà vl vsvngrì kaq chutchángā lún lvm dvpat lòngzàpè yesu svng zíshì yàngì we Gvray àngò shóngnøt svng shvngbeí síngsháìe. Yalòngnø kám vsvngrì shvngbe ò vbóngwe kámnøt tvrà íwe mvtaq dvbùshvng mòngkà tiqlòng gø íe wanø dvkám bøà we íe.

Rvgaq mvgong móng taq moshìí vbøí rúkéò vsvngrì kaq dvban lvm dvpat vbø svng hangònø dvtan yàngà wedø mvrà vl vsvngrì kaq chutchángā lvm dvpat yesu nø wurgáng mvdàmø gønshaq zíshì yàngì weí rat shvnshér dø cúnshì ràwe, yesunø gálòng íwe dang døwe tvra taq vl vsngnø kàngnyéwe vhømlvm íwe svng shvdøm bøà we íe.

Màdvráwe bvnlì taq ripwe vsvngrì nø døwe tvra taq diwe ínø døngmvn bvnlì wa vsvngrì mangnø gálòng svng tuqlún daqwe dang, yesu àngò gálòng svng nøngmaqò síngrvl nøt, rvwvl nøt taqkèní vtoshìlvm mvsøn nvrøm bángkà svng tán shàì. Àngò shvdún mvtømshìwe dvsházà shóngnøt rìsvng síngshálvm dvpvt nøngmaq svng ègoìe. Gvrayí nø nøngmaq nímshàìwe rvtø vrvm nøngmaq svng nàroqāìwe gvray íe wanø nvngòn ziweí Svrabín koqkámpè Francis taq kèní dvshvt bøà we íe.