Màshvlawe tvrà svng shvlawe dang kèní vtangshìwe

Màshvlawe tvrà svng shvlawe dang kèní vtangshìwe

Svdiq mvdøngwe vsvng yáng kèní tuqrawe shìwvtrì svng kàngpè yesuí shóngnøt taqkèní vtang yàngà. Àngínø mvrà vl vsvngrì kaq kàngngéwe mvwàò we mvtaq àngmaq svng chutcháng lvm dvpat àng gøngshaq svng zíshì høqshaq shóngshìe.

Àngí nøngmaq svng mvrà vl:ì vsvngrì íshàwe sháò nvng nvng nøngmaq lvpatrì taq àng ripā:ì we gø íe. Rvcángcèrìò mvràrì shvngbe svng gvray àngnvng tiqdø vwánā kélvm shvdøm we íe. Gvray àngò dvsháza shóngnøt nø nøngmaq gø vrvm dvpat íwe svng sínhshá dvzvŕ we íe.

Wewa mvtaq àngdè tiqgóng svng shvzømshì mvlúnìwe kùngà vnønwe dang svnggø àng taqkèní shóngnøtí shvzømā ìwe íe. Nøngmaqí vhøm:ì we mvhøtlvm shìwvtrì, nøtyòl lvmrì shvngbe svnggø àngí shvzøm dèbangā ìe.

Yesu àngò shagóngnø yesu kristuq nvng nøngmaq svng vtoq vtip dvzvŕ we tvrà tiqlòng gø íe. Svrabín koqkámpè Francis shønwe taq yesu àngò shagóng nø yesu kristuq nvng vtoqshì nø mvrà chutāwe gømla tiqlòng niíe wae.

Welòng taqkèní yesu kristuq àng kadø cúnshì yàngì lòng svng cvn dvgøm lúnlvm dvpat nvng ngànshàpè kaq shóngnøt vwánā lúnlvm dvpat shvngøt dvtúwe gø íe. Àng dvtut shønwe taq yesu kristuq nø àngdèò kámshìnøt mvdàm tiqdá vsvngrìò kùngà vnønwe dang svnggø síngsháā lúnlvm svng dvkámwe gø íe wae.

Tiqdá vsvngkaq shóngnøt kèní kùngà vnønwe dangrì svng tubùm dvbangā lúnlvm yesu kristuq àngò laqyà svng cvndøng dvzaqshì lvm svng dvtú we gø íe. Wedø yesu àngò shagóng svng vtoshì lúnì we nø àngò jejú gømpaq tiqlòng íwe svng shvdøm nø nvngòn ziwe íe.