Mvnpè Gvrayí pvnmán we dvrèrì nvng vdu vbóng dø èvl nøng

September 1ni nø pvn mvn dvrèrì svng roqgvr nø vjúrøt shì we shvláò nvmlat tiqni wani íe.

We lòng nvng singnø Svrabín koqkámpè taq kèní rvgaq mvdàmø Gvrayò pvnmán dvrèrì mvdàm vdu vbóng dø gvlnø roqgvr shì lvm nvng dvshàwe móngdànrì kaq dvbang shì we rì wáshì shvla we svng tvnùng bøà we íe.

Rvgaq yachang nvng dvshà mvhøt we vsvngrìò ràngshvng wawe yadø zønli vkøn ráì we nø vsvngrì kaq svng vhøm nø vtoq vtip shì lvm svng tvnùngvtnà we íe.

Yadø íwe rvtø taq shvlá wa dvzaqshì lvm vchyake á:mì. Rvtø angdong dvpat wa wáshìnø rvtø yanggúng dvpat vjú mvldø waì we dang rìsvng mvwà lvm, vpø ring we bvnlìrì taq téwa vháng lún lvm dvzaq shài.

Nøngmaq taq ni vrvm lángshì we Jak sórì svng vchyak we bvnlì dvpat lángshàì emá mø:íni vwadø vjú mvzi we dangrì taq lángì weí dvbéì we ímá? Dvtøp shì rà á:mì.

Pàwálvm wani wedø ewaò we nø nøngmaq shvngbeò wulaq bvnlìrì svng vnøn dvzvŕ we ínø dvshà mvhoq vsvngrì kaq téwa dvshà lvm kaq svng vpo dvzvŕ we íe.

Pàwálvm wani mòngàn taq vlwe vsvngrì mvngu shàì we taqkèníchøm súnwáng mvlwe vsvngrì kaq svng tùbum dvbang shàì nø roqgvr shìràwe gø pvngyàng evl a-ìe.

Gvrayí pvnmán we dvrèrì kaq vdu vbóng lángshì ràwe shvng gø làngrérì nvng svngpvn mvdòrì taqkèní vdèò rvgaq nvng lvngcha shvlá lvm dvpat roqgvr shìlvm bvnlì døngjá vlwe svng shvdøm we íe.

Téwa dvshà mvhoq vsvngrì dvpat dvdamâì weí vsvng shvngbe dvpat mvngúí we pvnmán dvrèrì svng tiq dvcháni langshàì we taq cúnshàìnø vtølvm mvrà we íe.

Tiqgø nvng tiqgø tasvng vzømì we taq roqgvr kéì nø tùbum shàì.

Ya rvtø nø Gvrayò pvnmán we dang svng dvdamìnø vsvng shvngbe gø Gvrayí pvnmán we dvrèrì nvng tiq dvgàng wa íshàwe svng síngshá dvzvŕ we íe.

Pvnmán dvrèrì íwe nìna sha-ngarì taq vré shàì we taq kèní rvgaq yachyang tiqni mvdàm tiqni vkat manshì ráì we íe. Vsvngrìò mvpwe nøt taq kèní rvgaq mvdàmø zaqshøprì pémanshì ráì we svng shvdøm we íe.

Shvnip shvnar vhømò we vsvngrì nø kagø maq íe má? Vsvngrì dvhø tasvng vshuq wa-vm we, vsvng nvmvm werì taq kèní roqgvr kéì.

Téwa yadø yóga zønli vkønwe rvtø taq góng shiqshàn dang, wulaq bvnlìrì nvng dang vrvm taq vnøn we rì kaq svng tùbum dvzøm shì ràá:mì.

Yadø wá shàì we taq kèní mòngàn zìdang mø:íni móngdàn zìdangrì taq bvnlì màdá íwe vsvngrì yúm mvnshì rawe ínø vsvngrì dvhø vzøm vzap:ìwe dangrì taq gø shvla dø vlíng vpo lvm wa íe.

Add new comment

1 + 6 =