Mvrà vl vsvng rì kaqgø Gvray gvsvngí ìshøt zie (I) tut

Mvrà vl vsvng rì kaqgø Gvray gvsvngí ìshøt zie (I) tut

Gvrayí nø mvn we bvnlìrì wawe taq sórí lvpatrì svng íshøt ziwe íe. Lvpatrì wawe taq vsvngrì, nìnarì nvng nánirì vbáwe íe. Wedø ìshøt vtoshì rìò lvpat svng vlíng vpoā lvm dvpat Gvray àngí àng nvrøm dòng svng ègoìe.

Dvgùng vlwe nvng íshøt walòng svng Svrabín koqkámpè taqkèní yadø vtàn bøà we íe. We kà lvjøm nø shvlawe kà wanø lvjøm zíshì ràlonge. Weratnø Gvray nø kadvgvpgø shvlawe kà svng wa shønnø màshvlavwe kà svng shøn mvwáshì.

Shvla ka shøwe nø íshøt vlwe ínø, íshøt vlwe taqkèní jejú svng vtoshì lúnìe. Gvrayí nø àngò vbàngpa íwe vsvngrì nvng mvndvtèrì shvngbe kaqsvng èroq ègvrìe. Vsvngrì taq vlwe zitnøt, shánøtrì nø kadángte nvngòn kángwe ínìgø gvray àngí gvl shaqíwe shvlawe tvrà svngnø kadøgø vsat mvlúnò. Rvgaq yachangnø Gvray àngò shvlawe bvnlìrì taq vlwe íe.

Gvrayí nø àngò pvnmvn dvrèrì shvngbe kaqsvng shvlawe tvràrì wa bøn dvzvŕ mvyø we íe. Wedø íratnø gvray àngò nvmlat shvlá vtang ìshøt ziwe nø Yesu kristuq ni íráì.

Yesu kristuq nø dvciq lvpat mòngkà íráì. Dvzvŕ polo shønyàngì kàtaq nøngmaqò Yesu kristuq àngpè gvray taq dvgùng gùngshvng laqvl daq pàwálvm wani yesu kristuq taqkèní nøngmaq svng ìshøt ìgvnrì èshórāìe wanø shøn vtan yàngà.

Nøngmaq svng mvsat bøshàwe gvray àngò jà mvshér pvrá yalòng svng kadø íwe mvrà taqkèní gø shvmáng mvlúnò we mvtaq Gvray àngí nøngmaq mvdàm gvlshìwe dvsháza shóngnøt svng gø gvyaq mvlúnò. Gvrayí nøngmaq svng tiqni rvtø taq nøt vwángshì rawe svng ècaìe.

Gvray nø shvlá vtang àngpè àngmè nvng vbónge. Kadángte kàmvtanø nøtzaqwe ínìgø àngcèrì kaq gur lvm vtóng mvvl. Wedøni nøngmaq shvngbe nø mvrà mvdàm gvray dvpat téwa vchyak we àngcèrì íshàe. Pàwálvm wani nøngmaqò àngpè, àngmè maqí nøngmaq kaq èshòngìdøjejú gømpaq, íshøt ìgvnrì èzíì we íe.