Nvmlat boq vsvk tevmwe shaqrérìò àngni dvpat Svrabín koqkámpè Francis taq kèní tvnùng kàru.

Nvmlat boq vsvk tevmwe shaqrérìò àngni dvpat Svrabín koqkámpè Francis taq kèní tvnùng kàru.

Shóngshøngwe pèmè, vnvmchvngrì! "Eyv̀ngnøng, rvgaq mvpìm yabàn lv̀ngdø̀m høq Ngà nø kadvgvp gø namaq nvng tiqdø v̀llv́m íe,” wawe Mati 28:20 Dvbùshvng mùngkà yalòng nø Yesu kristuq àng muqlàng svng shi mvlo vm rvtø taq àng coqcánrì svng dvkám yàngà kà íe.

Shvngømré shølshú vgorì íshàwe Roma taq vl:ì we svradorì taqkèní gø shvngømrérì shvngbe tvle nàmaq svng shóngshàì we nøt kèní roqgvr ìwe svng shá dvzvŕ mvyø ìe. Zønli dvjáng vkønwe yanila taq yadø mvhøt lvm shìwvtrì vhømìe.

Vsvk tévmì vsvng tiqmaq nø lvpat zíshì we høqshaq bøn vmì. Yadø íwe rvtø taq gvrayí nø nøngmaq svng mègurìnø kadvgvp gø roqgvrā we svng dvdamshì shálvm shvdøm we íe. St. Joachim nvng Aná nínø vsvk svrøng ráì høshaq cvmré màshvzatnò nø àngní wa rvtø mvmenøng vl yàngì.

Àngní gvray kaq vjú røtshì we cvmré shvmánā lvm vjúrøt kàsvng gvray àngí táā bøà mèpvng shvnshér pvlàcè taqkèní dvbùlvm shvngkà svng dvtá yàngà nø dvbù necì vyø yàngì we svng yàng lúngì dvgv6 Gvrayí nø nøngmaq svng kadvgvp ínìgø nøt dvshà lvm vhømì dvgvp àngò muqlàng dvzvŕ rìsvng dvzvŕ ònø nøt shèløm:mìe.

Tiqkvt kvt we muqlàng dvzvŕ rì nø nøngmaq dvpat chøm vsvng tiqgø ku nøt shvløm lvm tuq rae. Àng taqkèní nøt shvløm we, dvbùshvng mòngkà nvng tuqrawe svng shvdøm we íe. Ínìgø tiqkvt kvt we lòng mvtuq ra dvgvp nøtyùl werì bøn sháìe.

Kadø íwe rvtø taq ínìgø gvray nø nøngmaq svng vtoqshì we íe. Tiqni taq yúm vtang tiqboqcè nø Gvray mòngkà èrøò. Shvring zaywàcè taqkèní shvgùn shvringwe èwàò. Kàdvtutshú rìdø vjúrøtshìwe èwàò. Gvrayí nø kadvgvpgø dalvm dø íwe jejú bvnlìrì svng wàònø dètanìe.

Gvray nø nvrshì we mvvl. Gvrayí dvkám we taq nà í bvnlì wá èdángòwe, mèdángò we ínìgøpaqdàng tiqpvn pvn cènø rírà longe. Pàwálvm wani gvray àngò bvnlì nø cvmwe tewe wawe mvvl rat íe wae. Nøngmaq shvngbe nø tiqchøm vsvng vnvmchvngrì íshànø ya lvpat àngshvr mònggvn taq nøngmaq rà vchyak ìwe svng shá dvzvŕ mvyø we rat íe wae.

Kàdvtutshú Joel shøn yàngì we taq shaqrérì ínø yøpnáng yàngònø vlù vlàngrì taq shønran yánglúnòe wae. Wedøni mònggvn svng dvcøp shvnvpmì we bvnlì taq shaqré cvmré wawe mvvl shvngbenø zømdàngwe svng síngshá dvzvŕ we íe.

Nøngmaq shvngbe taq vhømmì we màná dømrørìsvng gø mvcøngìnø dvtit tvle we gø wáshàì. Mvjàn mvkrøm nvdøprì vlwe tiqgø taq kèní nø mòngzøl lòng svng kadø vrang rawe tvrà síngshá lúngòe. Wedøni nøngmaq shvngbe vzømìwe kùngà taqkèní mònggvn svng mòngzøl dø dvcøp lúnlvm ílonge.

Svrabín koqkámpè Benedith XVI pèí dvká we mòngkà taq vsvk tévmì we vsvngrì ò vjúrøt kà taqkèní shvngømré svng roqgvr lúnòe wanø 2012 nø taq dvtú yàngà. Shóngshøngwe pèmè vnvmchvngrì shaqré shaqtangrìò vjúrøt kà shaqnø mònggvn nvng shvngømré dvpat mvdøng rà vchyak we tiqlòngni íe.

Téwa yadø yóga dvjáng vkønwe rvtø taq mvrùmè møtnø tìma pvlòngwe rvmèø shøchøm tiqchøm vdòng tiqdø zaqlè dìì we vsvngrì wa íshàrat shvngbeò vjú røt kà shaqnø gvzà ni vchyak we íe.