Svràbín koqkám pè, Vatican wa,  dvnù:ngò nø svnat mvzøl vshøm dvm  shvrì daqò we lega angkàng pè svng shá bø shà wa Italy yérìí shønò we shvngkà.

Svràbín koqkám pè, Vatican wa,  dvnù:ngò nø svnat mvzøl vshøm dvm  shvrì daqò we lega angkàng pè svng shá bø shà wa Italy yérìí shønò we shvngkà.

Svràbín koqkám pè, Vatican wa,  dvnù:ngò nø svnat mvzøl vshøm dvm vbá nø shvrì daqò we lega angkàng pè svng shá bø shà we íe. Wedø ínìgø wegø' svng ang íe wanø dvrá uqbvdè taq kèní kàciq rvtnò we shini màvl we íe. Dvyekàn nø Bindit Móngdàn vsvng íwe íe. Vatican lùngchùngyé mvdò rìí gø shá bøà we íe. Yakvt Milan lùngchùngyé mvdò rìgø  Vatican lùngchùngyé mvdò rìnvng tiqdø vzømnø bvnchvt ang mvtú gún dvtopò we svng shálún shìwe íe.
            
Yàrvtø taq a:ngí wà bøà we tvra dang svng kadø vgvr lvm dvpvt gø shvgùnò we íe. Italy shvngkà dvp ( ANSA) yvng kèní shønò we taq vsvng vram shvngbè nøtlúm wenø shvgùnò we vsvng rìí, mvrà vlé bøà wepè kayáng vlwe svng sháò lòng nì íe. Wervt angnø bindit yang ímá, Roma Vatican yvng ímá wawe shá mvyø we dang íe, wae.

Italy yérìí nvmlat dvka:ngò we shvngkà taq we legà yvng (9) milimiter yàng nø svnat yvng zømdang we svnat dvre (3) pvn íwe svng shálún shìwe íe. 

    Wedø waòwe nø Vaticanò gvmsòng dang nvng gø singwe bvnchvt rìnvng sing we íe. Nvmlvt dvkang bøà we shvngkà taq mvdvm yvng dvtvn shìwe dvrè rìnvng tiqdø yuru gvmsòng (10) dan gø vbá we svng shálún shìwe íe. Kapvn rvt kadø íwe dang nvng sing we svng chvtchvt shìnì mvshá shìwe íe.
             Wedø shvrì daqò we lega angkàng vlwe shvrà màbá we ínìgø bindit dvsit kóng vbá we kaqsvng shálún shìe. Svràbín koqkám pè, Vatican st. Peter nøqngøm zùng wáng shvrà wanø dvtúò we íe.We legà gøm nvmlvt tuq we lega chøm nø milanò vzàng lvp (7) ming vsvr we Peschiera Borromeo wamà yvng ínø, 
Lega chøm shølshúrìí gvlvng daq Móngdàn àna baì rìsvng shvngøtnò nø shá dvzvr bøà we íe. We lega svng August shvlá (8) ya dørùm dvgvp tuqwe lega svng kayaì, Myoner, yatgwrt vrvm gún dvtopò we rvtø taq vyá shì rawe svng shálún shìwe íe.

Ref:Catholic News Agency
Kàtvlíng Svra Paul Hpu Ye Dwe
#rvarawang #rvapastoralcare #PopeFranics #Vatican