Svrabín koqkámpè Francis Lutheran Christian shvngømré rìnvng vhømnø dvmàn we

Svrabín koqkámpè Francis Lutheran Christian shvngømré rìnvng vh

Svrabín koqkámpè Francis Lutheran Christian shvngømré rìnvng vhømnø dvmàn we taq Yesu kristuq nø vrvm vrømnø dvmàn weáwe tvrà ínø nøngmaq nvng tiqdø íshàe wanø vtàn bøà.

Vlé vmìwe June 25 ni taq Svrabín koqkámpè Francis nø Lutheran World Federation dvpat tuqráì we gvsa rìnvng vhømnø dvmàn we taq Lutheran shvngømré rìnvng Catholic shvngømré rìkaq svng dvtúwe mòngkà taq vrvm vrá lvm tvrà svng dìì we Christian mvdòrì dvhø kadø íwe yaklvm shìwvtrì vlwe ínìgø nøt dvzaq shàìnø zàn dvtut dìlvm nvngòn ziwe íe.

Yadø Catholic shvngømré nvng Lutheran shvngømré rìò vzøm we vrvm vrá lvm tvrà svng pvngshì rág we nø 1980 nøng kèní íbøì. Gvray tiqgø, tiqgóng nvng tìløp kámshì we tvrà tiq tvrà taqni kámnøt vdòng taq vrvm vrá lvm tvrà tóngshì we svng gø shálún shìe.

Tiq gvray svng wa noqì AD325 nøngò Council of Nicene taqkàciq gvlshì yàngìwe dvzvŕ rìò kámnøt tvrà ( The Nicene creed) wawe nø Catholic, Orthodox, Lutheran nvng vnvmchvng shvngømré mvmeí vtoshì we kámnøt tvrà ni íe.

Yalòngnø nøngmaq Christian mvdòrì mvmeí vto shàìwe kámnøt tvrà zaqshøp gø íe. Weratnø 1700 nøng gømlvm írawe byómè, tuqrawe 2025 nøng svng mvsat byómè wàlvm dvgø shàì wanø Svrabín koqkámpè Francis taq kèní nvngòn ziwe íe.

Kám vsvngrì shvngbenø mvrà chutāwe svng vtoshì lúnlvm dvpat Yesu kristuq àngò bøng kèní tìløp kám shàì nø dvshér shàìe. Yalòng tìløp kámshìwe tvrà taqkèní kám vsvngrì shvngbe svng vrvm vrá lvm tvrà taq dílúnìe.

Tìløp kámshìwe jejú gømla yalòng nø kám vsvng shvngbeò kámnøt mvpvng mvdøng íwe jejú tiqlòng niíe. Ya jejú shvkse lòng taq shvngbe nø vrvm vrálvm, mvngushì lvm svng lúnshìwe tvra íe. Tvsvng rvwìngwe, vtùwe, mànvp yàngwe mvshøl rìsvng shvnvp nø shvrvm shvrá shìlvm nø Sacramento jejú gømla taqni vlwe íe wanø Svrabín koqkámpè Francis taq kèní dvkám we íe.

Kám vsvngrì shvngbe mvngushì nø vjúrøt shìwe wálúnì we nø gvray àngò jejú ratni íe. Nøngmaq shvngømré àng mvdò dòrìò vtoq vtip we tvrà kèní lúnshìwe mø:í. Gvray àngò jejúnø nøngmaqò mvshøl mèyàngrì, nøt mvsøn rìsvng dvshvn dvshérāwe íe. Vnvpwe vrvm vrá tvrà, tiqnøt tiq mvyùng wáshìlvm svng tvrà tóngāwe íe.

Yesu kristuq àngò kùlwàng vdòng taq tiqdø mvngushì ràlonge. Yesu kristuq àngò shagóng nø nøngmaq tasvng vkangì we taqkèní zádvzvr ìe. Nøngmaq nø yesuq kristuq àng nvng tvpníshì lvm tvrà svng vdè tiqgóng taqkèní wa láì we rat nøngmaq kám vsvngrì dvhø taqgø zà lvm shìwvtrì vhøm mìe.

Nøngmaq kám vsvngrìí vrvm vrá lvm tvrà svng tóng dvzaq shàì we ínìgø núngpà tiqlòng taq tiqdø noqngøm we tvrà svng wá mvlúnì wenø kàngpè yesu àngí dvshà mvhøt we vhømò lòng ni íe wanø Svrabín koqkámpè Francis taq kèní dvtú bøà we íe.

Làngdøm taq Lutheran shvngømré rìgø, Catholic shvngømré rìgø shvngbe nø tiqlòng wa íshàe wanø Yesuí shèngøt yàngshàwe vjú røt kàtaq kèní vjúrøt shìlvm dvkám nø vrìng bøà we íe.