Svrabín koqkámpè Francis taq kèní Iraq móngdàn øpshúrì kaq svng vsvng màngpòngrì shvngbe vrvm vrá lvm vrá tiqkvt vranglvm dvkám we

Svrabín koqkámpè Francis taq kèní Iraq móngdàn øpshúrì kaq svng vsvng màngpòngrì shvngbe vrvm vrá lvm vrá tiqkvt vranglvm dvkám we 

Svrabín koqkámpè Francis nø Iraq móngdàn vsvngrì nvng gvsa krønmangrì kaq mòngkà tvnùngò we taq wemóng taq rvtø yanggúng vzi vrùng wawe nvng mvjànrì bøn bøì mëpvng móng lvmang lòng døngmanwe tvrà taq riplvm dang tvnùng bøà.

We móng taq vkøn we bvnchvtrì, téwa nvngòn vnønwe dvshá mvhoq vsvngrì kaq roqgvrā lvm dvpat dvsháza mvdòrì poqpvngò nø wálún lvm dvkám bøà. Mònggvn svng téwa shvla dø vrang lúnlvm, vsvng shvngbe vzømì nø vrvm vrá lvm dvpat dvbangā ké ràwe dang svng tvnùng bøà.

Svrabín koqkámpè taqkèní vtànò we taq nøngrì mvme nøng naqhøq móngdàn vdòng taq vzi vrùng wawe, mvjàn bønwe , dvki vrè we, dvcìrì dvhø rvwìng we, shvngømrérì dvhø vtùwe nvng tónglaqyà rìsvng vgámwe rì taqkèní shvla we tvrà svng vwáng shàìnø dvcø shvnvp ràwe, mèpvng mèyà cèrì dvpat shvlawe lvpat rìsvng dvcøp dvgøā lvm dvpat Iraq móngdànò dvcì vgorì shvngømré vrvmò shølshúrì tóng laqyà vgo rì nvng móng øpshúrì nvng vhømnø dvmvnwe wálún bøshà wae.

Àng dvtut shøne taq àngnvm àngchvngrì dø vrám vrá lvm wawe taq nøt døng nøt shvyang shìwe, vdu vbóng we dvrá taq roqgvr kélvm, shvngbe nø gvray shóngnøt vdòng taq vpø shvring kélvm svng dvkám bøà we íe.

Wedø vrvm vrá we tvrà svng wálún bøwe mèpvng nø vsvngrì shvngbe ò dvgùng vl lvm dvcøp dvgøā ràlonge. Nøngmaq shvngbe nø todøwa vl lvm mø:í, téshvla we tvrà svng tóng dvzaqshì ràe.

Weratnø shvngbe nø vrvm vrá we taq vzømlvm, shvnip shvnvr we dangrì vgám lvm nvng tasvng dvsháza shóngnøt kèní roqgvr we bvnlìrì taq dvzaqshì ràwe svng tvnùng bøà we íe.

Svrabín koqkámpè Francis taq kèní Iraq móng øpshúrì nvng gvsa krønmangrì kaq goò nø dvmàn bøì we àng manggá nø móngdàn vdòng vrvm vrá lvm dang shvrúng nøt svng dvhànglvm, àngmaq dvhø taq mvyøn gømpaq vmwe bvnlìrì vgám lúnlvm, āna vmíng vkángrì mà dvrádø lángò we dang mvwàlvm, vdu vbóng we dvrá uqbvdirì vdòng taq shøl lúnlvm nvng Iraq móng làngrérì ò shvlawe yøpnvng shøngranrì dvgøā lúnlvm dvpat dvkám bøà we íe.