Svrabín koqkámpè Francis taq kèní mvniq rvmèrì taq bvnlì warì svng nvngòn zíòwe shvngkà

Svrabín koqkámpè Francis taq kèní mvniq rvmèrì taq bvnlì warì svng nvngòn zíòwe shvngkà

Svrabín koqkámpè Francis taq kèní Coronavirus yóga zønlì vkøn we rvtø taq vsvngrì svng ngakwìwe dang taq kèní tùbumshìwe mvniq rvmè taq nga kwìwe vsvngrì kaq oqà wawe kàtaq kèní nvngòn zíòwe íe.

Svrabín koqkámpè Francis taq kèní mòngàn mvniq rvmèrì nvng singnø kringmvnrì kaq svng June 17 ni taq zíbøawe Video massage tiqlòng taq yadø íwe zønlì vkønø dvshà mvhøt lvm vhømòwe shøcelrì svng nvngòn zíòwe íe. Àngmaqnø svre dvkéwe bvnlì vdòng taq bvnlì wá dvzaq shìweí vsvngrì vm:aq lvm dang tùbumshìwe írvt oqà wá vpøe wanø tvnùngvtnà weíe.

Dvtut shønwe taq mvniq rvmèrì taq ngakwì bvnlìrì nø ya rvtø taq gvzà vchyak ráì. Coronavirus yóga zønlì vkønwe rvtø taq àngmaq nø gvzà tønshìnø dvshákamshì bøìwe íe. Àngmaqí chømlo mvlúnò, chøm vsvng, rvmnvngrì nvng vdè rvgaq kèní vrúmwe shvràrì taq rvtø naq naq bvnlì døngjá rinø dvzaq shìe.

UN taq kèní gún dvtupòwe taq zaqlèwàng diwe vsvng 150000- 200000 dángte nø ya zønli rvtnø mvniq rvmè mvdàmø dønké òe wae. Svrabín koqkámpè Francisò mòngkà taq kèní àngmaq svng shønbøawe taq Yesu àngò nvmlat cvnshúrì nø ngakwiwe vsvngrì íe. Wedø tiqdvchá nàmaq gøvrvm gø Gvray taq kám vlømshì we nøt taq kèní vzøm lvm dvtú bøa we íe.

"Gvray yáng kèní mòngzølwe jejúnø nàmaq gø vrvm nvng chøm vsvngrì shvngbeí vtoshì leqlún nøng wanø vjúrøta bøà we íe.

#vaticanshvngkà