Vjú røt shìwe taqkèní yaklvm shìwvtrì svng vle lúnì we

Vjú røt shìwe taqkèní yaklvm shìwvtrì svng vle lúnì we

  Svrabín koqkámpè Francis taq kèní lvbán vrvm móng vsvngrì nvng vhøm we lìpùng taq yaklvm shìwvtrì svng vle lúnlvm dvpat nø kùngà shaq vlràwe svng tvnùng bøà we íe.

  Svrabín koqkámpè Francis taq kèní vjú røt shìwe taq vhøm sháìwe bvnchvtrì 3 lòng svng vtànvtnà. Nøt vlángshìwe, pvlàcè dang taq nøt vtiqrà ísháshìwe nvng vjú røt shìwe taq nøt mvlúmwe, vzing shàìwe svng vtàn bøà. Nøt vlángshìwe Yalòngnø vjú røt shìwe dang taqwa mvtaq nøngmaqí wàìwe bvnlì rì taq gø vhøm sháìwe íe.

   Vsvngrìò nøt wawe nø tiqtvtà svngwa rvtø yanggúng nøt caqshìlvm nø rvzaq longe.wedø bønwe lòngnø ngàshàpèí dvløt gvzàmwe ínø welòng taq nøt dvcvmshàì we ínìnø pà tiqpvn svnggø shvladø wálún we mvvl long. Svrabín koqkámpè taqkèní shvdøm we taq nøt vlángshì wenø mvrà tiqlòngdø íe wanø mvlán shàì we ínìgø welòng svng mvngan ràlongwe íe. Yesu kristuq nø kani, karvtø taq tuqlongwe svng nøngmaqí mvshálúnìwe íratnø nøt vdøng taq dvgøshàì weí àngdè nvng singwe bvnlìrì taq dvzaq dvkángshì ràwe svng shvdøm we íe.

Nøt vlángshì nø vhwámwe

  Vjú røt shìwe taq kèní pà vjúgø mvlúnshì, nøngmaq svng nøtshømlvm nøt kùngà svng zí mvlúnò wanø dvdam shàì wenø nøt vhwámì wewa íe. Tiqkvt kvt gvrayí nøngmaq svng nøt vtiqlvm vhøm dvzvŕ sháòe. Wedø íwe rvtø taq nøngmaqnø gvray taq nøngmaqò kámnøt svng gvlshì ràwe íe. Tiqkvt kvt nøt mvlúmwe, lvgùnwe, vjúrøt shìwe tvrà svng vtùwe tvrànø rvcángvè tiqgøò lvpat svng vtùwe wa íe wanø Svrabín koqkámpè taqkèní dvtú bøà we íe.

  Welòng nø lvpat shídvzvr sháòwe mvrà 2 lòng taqkèní 1 lòng íwe pvlàcè lvpat shí dvzvŕ we svng shvdøm we íe. Vjú røt shìwe taq dvzaqshì we Yadø vjúrøt dvzaqshì ràwe tvrà taq nøt vtiqlvm rì vhømìwe rvtø rìtaq rvcángcèrì nø vjúrøt shìwe tvrà svng zàn tvtut dvzaqshì ràwe svng dvkám we íe. Shvnshér vsvngrì shvngbe nø yadø íwe tvrà svng leònø vjúrøt dvzaqshì weí dvzaq dvkángshì yàngìwe svng yàngìnø nøt kùngà lushàì Kám vsvng tiqgø nø kadø íwe rvtø taq ínìgø vjú røt shìwe tvsvng zømshìlvm dvkám we íe.

  Svrabín koqkámpè Francis taq kèní gvray nø nøngmaq svng yaklvm shìwvtrì dvhø taq àngpè tiqgø shvrà taqkèní kámnøt tvrà taq vjúrøt shìwe svng wàlvm dvgøāwe ínø welòng taq shóngshì ràwe svng Svrabín koqkámpè Francis taq kèní shvdøm we nvngòn zikà tvnùng bøà we íe.