Vjúrøt shì we, nøt shvdøk shìweí nøt mvsøn sømsaqlvm dvpat wawá shìwe ínìnø rvcvngcè rìò vjúrøt shìwe tóng dvrá mø:í

Svrabín koqkámpè Francis taqkèní vlevmì we lvbán taq shvngøt dvtú we shvngkà taq vjúrøt shìlvm dang nvng singnø shvgùn zàywà bok taqkèní shvngøt dvtú bøà we íe. Chvpdap taq Gvray gvsvngí nø tòniò svng tvnùngò we svng shvgùn zàywà bok taq vtanshaq íe. Ya lvbán vdòng taq nø mònggvn taq vkøn we yóga zønli ratnø zínkéò vsvng Italy móngdàn taq tiqni mvdàm tiqni luq mvnshì ráì we ínø tiqgø nvng tiqgø tvp tvp vl nø vtoq vtip we mvwá shìlvm dvkám bøà. Wedø vtoq vtip we mvwáshì lvm nvng sing nø nøt mvbyo lvm vle wanø vtànvtnà.

Wedø íwe taq tiqgø nvng tiqgø gvt gvt vl nø vtoq vtip lvm shvdøm we íe. Gvray ínø nøng maq svng cvmré gòni svng angmèí mvkokvt nòdø mèkokì we íe angmèí angcè cvmré gòni svng mvkokò we nø gvzà vnvp we tvrà ínø wedø tiqdvchá Gvrayí nøng maq svng gø we døni mèkok ìe. Yalòng nø shvngømréò mvnggá gø íe wae.

Noqngøm tøngnø vdòng taq ngø we cvmré gòni svng mènàgám nøngni, pàwálvm wani ang ngøwe kàyalòng nø gvray angò dvsháza shóngnøt svng wáshì dvzvŕ we íe. Gvray mv vl, dvshá mvhøtwe mv vl wanø lánshì dvzvŕ we ngàshàpè ò gvzàmwe svng garshì lúnlvm dvpat shvgùn zàywà bok taqkèní dvkám shaq íe.

Shvgùn zàywà bok taqkèní vjúrøt kàrì nø tòniò dvrá nvng vdu vbóng dø wáshì we íe, pàwálvm wani Gvray angkaq svre nøtí vpø shvring we nø bashà lvpat svng kømgøm jór dvzvŕ e. We vjúrøt kàrì taq kèní nøng maq svng dvki vrè we rìkaq vgám lún we íe. Ínì gø yanila bat taq vsvng mvŕdàngø dvgùn vl lvm, dvgùng lushì lvm dvpat vjúrøt shìwe nø vléshì we tvrà íe wanø kàngpè yesuí dvkám yàngngà dø Svrabín koqkámpè Francis taq kèní gø shvdøm we íe.

Jøng jøng ni jòwe vjúrøt shìlvm wawe taq chvpdap bønráì we tòniò dvrátaq Gvray ang shóngwám shìdø yàngnø síngshá lvm vko vkáng zíshaq íe. Vjúrøt shìe wawe taq angdèò dòngnøt mvsøn kèní bunglòng we kàciq rì taqkèní røtshì lvm vchyake. Gvray angò angcø angcèrì kaq shóngshì gøò vjúrøt shìwe taq angnvm angchangrì mvtaq ngànshàpè høqshaq vchyake.

Vjúrøt shìwe svng angdèò lvpatò shìwvt angpvn pvn taq kèní nøt shøm dvzvŕ we cìtiq lòngku gø mvsat shìlvm mø:í. Wedø nøt shàban lvm dvpat wa vjúrøt shìwe nø rvcvngcè rìò vjúrøt shì we tvrà mø:í we svng shvdøm we íe. Welòng svng síngshá lvm dvpat kàngpè yesuí dvzvŕ rìkaq shvngøt yàngà we vjúrøt kà taqkèní yánglún shìe.

Angdèò lvpat taq dvshà mvhøt nø rvyù rvyøl we rìkaq nø shvgùn zàywà rì taqkèní dvbana we íe. Yadø noqngøm tøngnø rìtaq vjúrøt shìlvm svng yúdaq dvcìrì kèní pvngshì ráì we íe. Wedø írat shvngømré taqkèní shvgùn zàywà bok svng nø noqngøm tøngnø vdòng taq lángshì we vjúrøt kàrì wanø vto shì we íe. Yadø shvgùn zàywà rìsvng nvmlat taq nø Israel dvcìrìò vjúrøtshì we tóngku vto shìyàngì we ínìgø mèpvng kaq nø shvngømréò vjúrøt kàku lángshìnø nvngòn lúshàìe.

Nøngmaq rvcvngcè rìò vjúrøt kànø mònggvn rvgaq nvng noqngøm tøngnø vzøm we taq pvlàcè dvpat chutcháng lúnlvm dvpat wanø gø shøn lúnshìe. Vjúrøt kà yarìnø noqngøm tøngnø taq kèní pvngshì nø kayáng màyáng vl we vsvng shvngbe kaq tuq ráì we íe. Wedø írat noqngøm tøngnøò bángkà nø vsvng kayaò dvsha mvhøt we dangrì shvngbe svng vtoaò we íe wanø shøn we kà vle.

Mònggvn yachàng nø shvgùn zàywà vjúrøt kàrì dvciq lvpat rà vchyak longe wanø Svrabín koqkám taqkèní vtànvtà we íe. Shvgùn zàywà bok vjúrøt kà taqkèní kùngà vnøn we vsvngrì kaq chutcháng lúnwe kàgap rì gvlshì shaq íwe mvtaq mònggvnò pø zaqshøp wawe svre dvké we dangrì taqgø dvkámnø shvdøm we íe.

Shvgùn zàywà bok taqkèní bashàrìò mvshøl mèya nvng Gvray angò shóngshì we dangrì svng yángshá lvm shvdøm we íe. Gvray gvsvngò shvnshvŕ we bàngzìrì nø vsvng shvngbeò dòngnøt mvsøn taq vl we svng Gvray mv vl wanø vgám we Atheism rì taq kèní vtù nø gvzàm we svng Gvray mvshóngshì wanø Svrabín koqkámpèí vtànvtnà.

Vsvngrì nvng vsvr dø èvl nø vsvngrì kaq mvshóng mvwámshì we nø Gvray kaq káme wanø èshønwe ínìgø Gvray mv vl wawe tvrà svng ècvn we nvng vbóngvme. Yalòng nø vléshì we kámnø tvrà ni ílonge. Tòniò dvrásvng mvshóng shìnø Gvray kaq shóngshønge wawe nø mvrà gvbà tiqlòng ni íe wanø dvkám bøà.

Add new comment

3 + 3 =