Vsvngrì vzàng kèní téwa vzømwe mònggvn ílvm dvpat dvzaqshì ràwe

Vsvngrì vzàng kèní téwa vzømwe mònggvn ílvm dvpat dvzaqshì ràwe

Rvgaq yachangmvdàmø mvngu shàìnø vlìwe vsvngrì shvngbenø mònggvn vsvng shvngbeò vjú dvpat vdu vbóngwe dvrá nvng mòngzøl lòng lúnlvm, cvm vtang gø svng rvtø kéì we mònggvn lvpat svng vrang shì rà á:mì. Nøngmaq shvngbeò tuqrawe mèpvng lvptrì nø vnvp dø dvcøp dvgø shì ràwe íe.

Màbóngwe svngpvn tóng laqyàrì taq vzømìwe lvpatrì ívdu á:mì.wedø íwe lvpat taq nøngmaqnø mòngzøldø vzømìnø vrvm vrálvm vkvt kèní dvgø shì ràwe íe. Yadang nvng sing nø dvzvŕ 2:9-11 "Nøngmaq Parti vsvng, Medi vsvng, Elam vsvng nvng Mesopotamia móng taq v̄l vsvng; Yuda nvng Kapadocia móngwál, Pontus nvng Asia móngwál;

 Frigia nvng Pamfilia móngwál, Ejip móng nvng Kureni wamà shvnvng Libia móng, yadv́ng móng taq à:lì rì nvng Roma wamà kèní zaqlè dì ráì we Yuda vsvngrì gø, Yuda mvdò taq gòng ráì vsvng nvng gø; 11 Kreti vsvng nvng Arab vsvngrì, nøngmaq shvngbeí nø angmaqí shø̀:nò we Gvray Angò vtiqlv́m bv̀nlì mvshǿl, nøngmaq vdèdè kàí ni tá lún bǿshà,” wae."

Wawe taqkèní shvdøm nø nvngòn ziwe íe. Ya jømciqnø Jerusalem wamà àngshvrò dvjà svng dvkámwe mòngkàciq íe. Dvtan 21:3 taqgø " We mvdv̀mø, koqkv́m rúngtv̀ng kèní ngàí shaqmè tiq lòng tángòe. Shaq welòng nø, “Gvray v́lrà nø vsvngrì dvhø̀ø í daqì nø, Ang nø angmaq nvng tiqdø v̄l nø angmaq gø Ang basha rì* í longe.

Gvray Ang góng ni angmaq dvhø̀ø vl nø angmaq Gvray wáshì longe. wanø vru yàngà. Weratnø bashàrì nøngmaq shvngbeí rvgaq yachàng svng shvlawe vzøm vzap tvrà, tiqdø mòngzøldø mvngushì lúnwe vtóng svng vrang rà bøì we íe. We tvrà taq kagø nø kagø àngdè taq vlwe nvngòn kùngàrì nvng dvzaq shàì we ínìnø vzàng mvdàm téwa shvla we mònggvn dvjà svng vrang lún lúng:ìe.

Nøngmaqí rvgaq mvdàmø cvmaré, lvngàré rì shvngbe mvdàm gvrayí shvmánāwe dvsháza shóngnøt jejúrì téwa vnvpnø gwaqdø roqgvr dvzaqshì lvm dvkám bøà we íe. Luka 19:12-13 A:ngí shø̀:nò we nø, “Dvgùng v̄l we vgo zǿmshú tiq pè nø, koqkv́m vya vtoshilv́m dvpvt vrúm móng svng di dá:ngí vrá vdè móng svng vtv́nglvm dvda:mòe.

g 13 Wervt ang vshuq tiqcé gǿ goa:tnà dá:ngí, gv̀msùng tiqcé Mina* angmaq svng tvlēò nø, ‘Ngà mvtok rang dv́ngte yalù:ngí wùlaq èwà dánøng,’ a:lòe. wanø vru yàngà we mòngkà nø nøngmaq shvngbe nø tiq mvzuq wa wáshàì nø shvngbe vjú dvpat àngí vzí shaq íwe we vko vkáng svng roqgvr ràlonge. Tiqni rvtø taq àngí vrá we jejú kèní vrá røt longwe íe wanø shvdøm we íe.

Rvgaq yachàng dvpat kapa vjú svng èwàò dángyte nø mèpvng mèyàrì dvpat wáshì we ílòng svng vná mvdaq. Nøngmaqí wàìwe bvnlì ídángte nø àngdè tiqgøò vjú dvpat wa wáshìwe wá mvdaq. Shvngbeò dvpat vdu vbóngwe tvrà taqkèní we mvnggá svng tuqlún lvm wáshì ràe.

Tasvng rvwìngwe wá mvdaq. Welòng taqwa vpø ringwe àngò zaqshøprì svng vtoshì lún lúng:ìe. Kàngpë yesuí nøngmaq svng shvngøt dvtú we nø nøngmaq shvngbe vrvm vráì nø cvm vtang gø svng rvtø kéì we ínìnø muqlàng taqlvpmøgø nøngmaq shvngbenø téwa mòngzøl we jejúrì svng vtoshì lúnlvm íwe dang vtan ráà weratnø nøngmaq shvngbe nø tasvng roqgvr kéì weí àngò pvnmvnwe tvrà svng cvn dvgøm lvm wàì wanø nvngòn ziwe íe.