Za we vsvng rìsvng cì lvjv:ngò we taq gvza kám vrvm ku lvjv:ngã ràe wanø dvtú shìwe shvngkà.

Za we vsvng rìsvng cì lvjv:ngò we taq gvza kám vrvm ku lvjv:ngã ràe wanø dvtú shìwe shvngkà.

Vsvng mvnpòng tiq mvdo vdong taq nøtyòl nøtcvm sháò we vsvng bashà rì íshà rvt nøngmaqí vhø'mì we bvnchvtrì svng angnvm angchvng shóngnøt rìdø  mvkok kéìnø lvjv:ngã ràe wanø, Svrabín koqkám pè Francisí (2021) mònggvn shiqshvn we angni taq shøn bøà we íe.

Vwa dø dvpé shì we vdè nø vdè vsvng shvlá íe wanø dvdvm shìwe nønt svng shvmá:ngò nø dvgá vsvng rìsvng vrvm vrá nø vtoq vtip rae. Dvgá vsvngrì nvng vtoqvtip dv:ngí wa angmaqò nønt dvshà lvm rìsvng cì lvjáng lvm shá shì lù:nge. Angmaqò nønt dvsha nøt mvbyo we tvrà  kaqsvng vdèí dvdv:mà nø lvjáng ké ràe.

Catholic shvngømré taq kení nøng vrvm February (11) ni taq lut Gvray angmè bóy svng waò we íe. Mònggvn shiqshvn angnì svng gø (1992, may 13) nì taq wa lvm st. John Paul (2) í mvsvt shvdøng bøà we íe. Wedøí mònggvn shiqshvn lvm angnì svng nøng vrvm dvdv:mò nø té shvla we dang svng vlíng vpo lvm cvndøng lvm tvrà svng lún lvm waò we íe. Denøng vdòng taq cvndøng lvm nø mati dvbù shvng mòngkà (23:8) "pàwálv́m wani namaqò Shvngøtshú pè nø tiq pè wa èv́lanønge. Namaq shvngbe nø angnv̄m angchvng dvchǿng èínønge” wae. Wekà cvndøng lvm tvra nø " za we vsvng rì svng cì lvjá:ngàò ke angnvm angchvng rìdø dvzøm mvkok ké lvm svng dvshvt we íe.

Weni taq za we vsvng rì dvpvt, za vsvng rìsvng dvzøm mvkok ngò we rì dvpvt, shiqshvn lvm mvdò bvnlì zømshú rì dvpvt, za vsvng chøm rvp dvpvt,nvng angrì angyàng rvp rì dvpvt vjú røt dvbvng ke lvm angnì íe, wawe svng dvshvt we íe.

Dènøng cvndøng lvm dvpvt Svrabín koqkám pè Francisí vdè nø vdè vsvng shvlá íe wanø dvdvm shìwe rvsáng cè rìsvng, "nøngmaq kám we nø kà vhúng wa íninø nøngmaqí nø tiqdá vsv:ngò rà vchvt lòng svng mà dvdvmmãò we íe. Kàngpè Yesuí mòngkà  wa dvshv:ngò nø chvtdvp bvnlì mà-vl vsvng rì svng shvyøm nø mvrà shvri bøà we íe.

Nøngmaq nø vwadø dvpé shìnø vdè shvnvng yvng vlwe vsvng rikaq pà mvlánò dø vsvng kaq yvng mvtvm we vl mvdaq. Wedø waò nìnø muqlàng taqlapmø vl pè Ang tiq gǿò angcè rì wa tø'shì màpø' we íe. Pàwálv́m wani nøng maq shvngbè nø mònggvn taq angnvm angchvng dvchøng rìdø vl lvm dvpvt dvshvt we íe.